Pơma pơtôch hop akŏm, Thủ tướng pơma hơdăh, khei ‘năr âu ki, tơdrong lơ̆m apŭng plenh tĕh, tơ̆ tơring păng lơ̆m tĕh đak đei lơ tơdrong krê; tơdrong jĭ COVID-19 pơm tơlĕch tơdrong răm tôch dêh; to ‘mi kial tơplih ưh ‘lơ̆ng, tơdrong sar bar roi đunh roi krê, pơm tơlĕch hiog răm lơ găh bơngai, tơmam drăm, muk drăm tơpôl tơƀâp lơ pơmat tat yoa ƀơm ưh ‘lơ̆ng đơ̆ng ‘ngoăih; đei hloi lơ tơdrong nol hăm tơdrong jang tang găn sar bar.

Vă jang đang ‘lơ̆ng tơdrong jang lơ̆m sơnăm 2023 păng tơ̆ hơnăp kơnh, Thủ tướng athei dôm bơngai jang lơm Anih pơgơ̆r jang tang găn sar bar kơ tĕh đak păng dôm anih pơgơ̆r jang tơ̆ tơring hơnơ̆ng hlôh vao kơjăp, tơlĕch jang đei yoa ‘lơ̆ng rim trong jang, tơdrong tơgŭm đơ̆ng Đảng, tĕh đak, lơ̆m nŏh đei tơdrong tơchơ̆t 22 đơ̆ng Anih tơm Chinh trĭ păng dôm tơdrong jang đơ̆ng Khul kơdră tĕh đak găh tang găn sar bar kơ kon pơlei lăp hăm yăn âu păng đei yoa ‘lơ̆ng.