Pơgê 12/2, tơ̆ pơlei tơm Hạ Long dêh char Quảng Ninh, Thủ tướng Phạm Minh Chính pơgơ̆r Hop akŏm tơlĕch jang tơdrong bơ̆jang kiơ̆ tơdrong Tơchơ̆t kơsô̆ 30 đơ̆ng Anih tơm Chĭnh trĭ găh hơtŏk tơiung mŭk drăm tơpôl păng vei sơđơ̆ng teh đak, sơđơ̆ng tơring tơmăn đak Krong Hồng păng pơtrŭt tơmơ̆t jên jang Tơring hăm hơnăn “Jang hơdai hơtŏk tơiung - Tơplih ‘nao hơgei - Rơgoh păng Kơjăp”.

Pơma tơ̆ hop akŏm, Thủ tướng Phạm Minh Chính pơma hơdăh, tơdrong iŏk jang tôch ai tơmam, tơdrong ‘lơ̆ng vă hơtŏk tơiung hrĕnh, kơjăp tơring tơmăn đak Krong Hồng tơpă ‘noh jing tơring ‘lơ̆ng hơtŏk tơiung tih hloh, đei hơnăp jang tơƀôh trong vă jang, chông ba tơdrong hơmet ming dơ̆ng mŭk drăm păng tơplih tơdrong tŏk kơ teh đak. Thủ tướng athei dôm anih jang mă loi ‘noh jĭ dôm tơring lơ̆m tơring tơpăt jang kiơ̆ dôm tơdrong jang tơroi lơ̆m tơdrong tơchơ̆t, lơ̆m noh pơma hơdăh jang kiơ̆ kơtang dôm hơnăp jang, trong jang hơtŏk tơiung tơring kiơ̆ tơdrong tơchơ̆t đơ̆ng Đảng, Kuôk hô̆i, Khŭl kơdră teh đak; dôm tơdrong jang, trong vă jang, trong tơlĕch jang, pơgơ̆r jang đơ̆ng Khŭl kơdră teh đak, Thủ tướng teh đak.