Thủ tướng Phạm Minh Chính ăn tơbăt, đơ̆ng rŏng kơ teh đak Mi tơchơ̆t gah iŏk thuê̆, jơnŭm pơgơ̆r teh đak hlôi tơlĕch lơ trong pơm jang tơtom, hơbĕch gah chĭnh trĭ, jang tơbôl; kơchăng tơlĕch Tơchơ̆t đơ̆ng Jơnŭm pơgơ̆r teh đak, kăt tơjur dôm thuê̆ pơkăp hăm minh ƀar tơmam drăm đơ̆ng teh đak Mi vih ah kơsô̆ 0. Truh dang ei, minh ƀar tơdrong tơlĕch jang đơ̆ng Mi tơrĕk adoi đei sek tơlang kiơ̆ pơkăp đơ̆ng luơ̆t teh đak păng pơdrơ̆ng kơ 2 teh đak.

Hăm tơdrong jang 'nao, Thủ tướng pơgơ̆r, khei năr truh athei mă hơbĕch hơbal hloh lơ̆m tơdrong pơma đam; iŏk yua dôm tơdrong hlôh vao hlôi đei đơ̆ng hơdrol sơ̆ truh dang ei vă pơma đam. Gah tơchơ̆t, Thủ tướng ră hơdah tơđrong tơguăt dôm tơdrong pơgơ̆r jang đơ̆ng Anih tơm Chĭnh trĭ, Tổng Bí thư, Jơnŭm pơgơ̆r teh đak, Thủ tướng teh đak; chih akŏm tơdrong kăl đơ̆ng gah teh đak Mi vă pơjing trong pơm jang; sơkơ̆t hơdah pơma jĭ trong jang kăp gĭt, dơnơm vă hơtŏ tơdrong jang tĕch răt teh đak Mi gơh kơjăp sơđơ̆ng đunh đai