Tơ̆ 'măng pơma đam, Thủ tướng Phạm Minh Chính sơkơ̆t hơdah 'măng năm tơmang Việt Nam lơ̆m khei năr tơjê̆ ou sơ̆ đơ̆ng Tổng Bí thư, Kơdră teh đak Trung Quốc Tập Cận Bình jĭ tơdrong kăp gĭt, sơkơ̆t hơdah trong jang tơbôl đunh đai kơ 2 Đảng, 2 teh đak. Thủ tướng akhan, 2 pah pơtoi asong khul kơpal năm hơpeh hơpong dih băl; hơtŏk kơtang tơdrong jang hơdoi gah mŭk drăm, tĕch pơdro, asong jang kiơ̆ pơkăp hơtŏ hơnơ̆ng, atŭm hăm noh pơih să tơdrong jang hơdoi lơ̆m tơdrong jang khua hŏk kơmăi kơmŏk 'nao, tơplih gơh hơgei, pơm trong 'nao ăn tơdrong tơbôl 2 pah.

Thủ tướng Lý Cường drơ̆ng nơ̆r hăm dôm tơdrong tơlĕch păng sơkơ̆t hơdah Trung Quốc kơchăng jang hadoi kơjăp hăm Việt Nam vă pơm hơdah tơdrong hlôh vao atŭm kơ đe kơdră kơpal 2 teh đak; hơtŏk pơma đam, hơmet đon lui kăp gĭt gah chĭn trĭ păng hơtŏk jang hơdoi tơpă, mă kăl noh lơ̆m dôm tơdrong jang nhen tĕch răt tơmam drăm, asong jang kiơ̆ trong 'nao păng ming man hơdoi rim tơdrong kăl pơyua.