Hop akŏm yoa Anih tơm tơlĕch nơ̆r sơkơ̆t tơmât jên jang, Anih tang măt ăn Nhật Bản păng Grŭp dôm khul jang mŭk drăm Nhật Bản vang pơgơ̆r păng đei pơih trư̆k tuyê̆n truh tơ̆ rơbâu anih tĕch mơdro lơ̆m tĕh đak Nhật Bản. Pơma tơ̆ hop akŏm, Thủ tướng Phạm Minh Chính tơroi dơ̆ng dôm tơdrong ‘lơ̆ng hơ iă lơ̆m tơdrong pơvei Việt Nam – Nhật Bản, Thủ tướng pơma hơdăh, Nhật Bản hlôi iŏk đei lơ tơdrong jơnei tih tên hăm mŭk drăm jang tŏk pran ‘lơ̆ng, jang đei kơmăy kơmŏk rơgei lơ̆m apŭng plenh tĕh păng jing 1 lơ̆m dôm tĕh đak năm hơdrol găh tơmât yoa kơmăy kơmŏk păng jang tŏk mŭk drămn kơsô̆, tơpôl kơsô̆.

Hop akŏm jĭ tơdrong tôch gĭt kăl vă 2 păh tơblang hơdăh dôm tơdrong ‘lơ̆ng kŭm nhen dôm tơdrong mơmat tat, pơlong nol ‘nao; roi tơƀôh dôm ƀai hŏk kăp gĭt vă đơ̆ng nŏh tơlĕch đei lơ trong jang, tơdrong jang ‘lơ̆ng tơ̆ hơnăp kơnh; tơgŭm bơ̆n jang đei lơ tơdrong ‘mĕh vă jang tŏk pran kơjăp tơ̆ rim tĕh đak, păng tơgop pơm hơtŏk tơdrong pơvei jang hơdoi gĭt kăl lui băl, ‘lơ̆ng hơ iă đơ̆ng Việt Nam păng Nhật Bản. Thủ tướng athei dôm anih tơm, anih jang kơpal, dôm bơngai jang khoa hŏk, dôm khul grŭp, anih tĕch mơdro đơ̆ng Nhật Bản păng Việt Nam vang pơma nuh, roi tơƀôh dôm tơdrong kăl vă tơgŭm ăn khul kơdră tĕh đak lơ trong jang đei yoa năm truh tơdrong jang tŏk pran kơjăp păng hơnŭk hơnoa đơ̆ng 2 păh.