Iung pơma tơ̆ hop akŏm, Thủ tướng Teh đak Phạm Minh Chính pơma hơdăh, tơdrong sar bar ma tuý hlôi păng tŏk bŏk jing tơdrong pơm pơrăm kơtang hloh hăm kon bơngai. Tơdrong đei ƀơm truh đơ̆ng ma tuý pơm ăn tôch kơtang hăm rim tơdrong mŭk drăm, oei sa jŏh ayŏ, tơpôl, sơđơ̆ng dơ̆ng kơjăp teh đak, pơm kơnê̆ truh jơhgơ̆m jăn kơ kon pơlei, adoi jing tơdrong tơm pơm ăn rim tơdrong yoch, pơjoă tơdrong sơđơ̆ng, pơdrŏng păng tơdrong atŏk tơ iung kơ rim teh đak, rim hơdrĕch hơdrung.

Tang măt ăn Khul kơdră Teh đak, Thủ tướng hôn bơnê kơtang dôm tơdrong hơdrin, tơgop; hôn bơnê dôm tơdrong plang ăn, hiong răm; păng hmach chơt hơ iă hloh hăm dôm tơdrong iŏk đei jơnei gĭt kăl đơ̆ng kang ƀô̆ kŏng ang kon pơlei, rim hơnih jang lơ̆m tang găn pơm glăi ma tuý khei năr au ki, tơgop gĭt kăl lơ̆m tơdrong iŏk đei atŏk tơ iung păng vei lăng sơđơ̆ng dơ̆ng kơjăp tơpôl kơ teh đak. Vă pơjing trong jang kơtang hloh dơ̆ng lơ̆m tang găn ma tuý, Thủ tướng athei, Bơ̆ jang tang găn păng dăr lăng ma tuý hơnơ̆ng đei trong chĕp pơgơ̆r kơ jăp đơ̆ng Khul Đảng, Khul kơdră chĕp pơgơ̆r tơring, lơ̆m au đei khul Kŏng ang kon pơlei ‘nŏh tơm hloh.