Tơdrong vă jang ou đei kon jên jang vă jê̆ 20.000 ti hlak jên, hăm hơnih ming man hơtăih kơjung dang 5 km, kơl trong gơng tơƀưh hăm trong Nghi Tàm, hơnih hơtuch tơƀưh hăm trong Trường Sa. Iung pơma tơ̆ Pơm lêh iung jang, Thủ tướng Phạm Minh Chính sơkơ̆t hơdăh, tơdrong iung jang ming man gơng Tứ Liên gô tơgop pơm sơđơ̆ng ‘lơ̆ng trong nơnăm lơ̆m hơnih kơdrơ̆m, tơƀưh dih băl đơ̆ng pơlei tơm Hà Nội hăm tơring găh Tu, Hơlĕch Tu đak kroong Hồng, dêh char Thái Nguyên, tơƀưh hăm Hơnih tơm Jơnŭm Kơchơ Pơdă tơmam drăm Teh đak păng jăl trong đơ̆ng cham gre păr Gia Bình năm tơ̆ Hà Nội, tơgop atŏk tơ iung mŭk drăm tơpôl kơ pơlei tơm Hà Nội păng Tơring Hơnih tơm. Thủ tướng  athei rim kơdră chĕp pơgơ̆r Đảng, Khul kơdră chĕp pơgơ̆r pơlei tơm Hà Nội akŏm tơlĕch jang kơtang pơrô̆ athei Tơngla tơmơ̆t jên jang, khul jang dăr lăng, bơngai iŏk jang păng rim hơnih ƀơm truh pơm kiơ̆ kơjăp dôm tơdrong kih thuơ̆t, tơdrong tơchơ̆t kơ khôi luơ̆t đei ƀơm truh, ưh pơm hơtŏk dơ̆ng kon jên ming man, ưh kơ lê̆ đei tơdrong sa pơgơ̆m pơjĭp, pơhoach brăh brư kon jên muk drăm Teh đak.