Thủ tướng pơgơ̆r ‘măng hop akŏm găh hla ar chih ming Tơdrong jang pơjing Đảng bộ Khŭl kơdră teh đak Thủ tướng Phạm Minh Chính ‘nao pơgơ̆r ‘măng hop akŏm mă 5 Anih pơgơ̆r jang kơ Khŭl kơdră teh đak pơtôch Tơdrong tơchơ̆t kơsô̆ 18 NQ/TW "Mĭnh ƀar tơdrong găh hơnơ̆ng tơplih ‘nao, proh hơmet khŭl jang kơ anih jang chĭnh trĭ tŏ sĕt bơngai, bơ̆jang đei yua, jơnei”. Tơ̆ ‘măng hop akŏm, Anih pơgơ̆r jang hlôi mơ̆ng hla ar chih tơroi tơbăt păng pơma dơnuh, ăn tơgop nơ̆r găh hla ar chih ming đơ̆ng Khŭl chĕp kơ̆l Đảng Khŭl kơdră teh đak pơtruh ăn Anih tơm Chĭnh trĭ găh Tơdrong jang pơtôch bơ̆jang đơ̆ng Khŭl chĕp kơ̆l Đảng khŭl kơdră teh đak, pơjing Đảng bộ Khŭl kơdră teh đak găh Trung ương. 

Kiơ̆ trong vă jang đơ̆ng Anih pơgơ̆r jang Trung ương, Đảng bộ Khŭl kơdră teh đak ‘noh đei dôm khŭl jang đảng lơ̆m dôm anih tơm, anih jang hơtŏ anih tơm, anih jang kơ Khŭl kơdră teh đak păng 1,2 đảng bộ lơ̆m dôm grŭp jang, kŏng ti tơm, anih mong jên mơdro sa teh đak. Pơtôch ‘măng hop akŏm, Thủ tướng pơjao kơ Anih tơm Nội vụ jang hơdai hăm dôm anih jang ƀơm truh chih iŏk dôm nơ̆r tơgop, chih hơmet ‘lơ̆ng Hla ar tơdrong jang hơdrol kơ pơtruh ăn Anih tơm Chĭnh trĭ. Lơ̆m kơplăh pơjing, chih hơmet ‘lơ̆ng tơdrong jang, athei bơ̆jang kiơ̆ tơpăt Tơdrong pơkăp đơ̆ng Đảng, dôm tơdrong kăl chĕp kơ̆l, dôm tơdrong hơgăt đơ̆ng Đảng păng jang kiơ̆ yan âu tơdrong jang đơ̆ng khŭl kơdră teh đak.