Sơng iŏk nơ̆r krao hơvơn đơ̆ng Thủ tướng Phạm Minh Chính, Thủ tướng Tây Ban Nha Pedro Sánchez hlôi iung năm tơmang Việt Nam đơ̆ng năr 8/4 truh năr 10/4. ‘Nou ‘măng mă blŭng Thủ tướng Tây Ban Nha iung năm tơmang Việt Nam jô̆ đơ̆ng ƀar teh đak pơjing tơbôl lơ̆m sơnăm 1977 păng jei jing ‘măng năm tơmang Việt nam đơ̆ng Kơdră kơpal kơ teh đak Tây Ban Nha jô̆ đơ̆ng ‘măng năm tơamang đơ̆ng Ƀok pơtao Juan Carlos hăm hơkăn ƀok Sofia lơ̆m sơnăm 2006.

Tây Ban Nha jĭ teh đak jang lơ̆m khul mă blŭng kơ Jơnŭm atŭm châu Âu kĭ pơkăp jang hơdoi gĭt kăl hăm Việt Nam lơ̆m sơnăm 2009. Teh đak ou jei jing mĭnh lơ̆m dôm teh đak blŭng a kĭ tơchơ̆t Tơdrong tơchơ̆t tơgŭm dŏng tơmơ̆t jên jang EU - Việt Nam. ‘Măng năm tơmang tơbăt hơdăh ăn pơtôch jang hơdoi ‘lơ̆ng liĕm ƀar păh teh đak lơ̆m khei năr ou ki, đơ̆ng chinh trĭ truh mŭk drăm, mơdro sa tơmơ̆t jên jang, jŏh ayŏ, vei lăng sơđơ̆ng, pơtho pơhrăm păng trong gre chơ tơmam drăm…