Kiơ̆ hla ar chih tơroi păng nơ̆r pơma lơ̆m hop akŏm đơ̆ng dôm Kơdră jang lơ̆m Ban Bí thư, pơma pơtôch hop akŏm, Tổng Bí thư Tô Lâm pơma hơdăh, athei hơtŏk tơdrong jang kiơ̆ khoa hŏk kơmăy kơmŏk mưh chă iŏk nơ̆r tơgop đơ̆ng kon pơlei, dôm anih jang kơpal đei pơjao athei jang ‘lơ̆ng tơdrong chih akŏm mă trŏ hăm nơ̆r tơgop đơ̆ng kon pơlei, tơroi ăn Quốc hội set hơlen păng tơchơ̆t.

Ƀơm truh 1,2 tơdrong jang kiơ̆ Tơdrong tơchơ̆t 18 đơ̆ng Trung ương găh hơnơ̆ng tơplih ‘nao, hơmet ming khul bơngai jang tơ̆ rim anih jang chinh trĭ tŏ sĕt bơngai, jang rơgei, đei yoa, Tổng Bí thư athei, Khul kơdră teh đak păng dôm anih tơm đei ƀơm truh klăih song hơnăp jang mă hơdăh mưh bơ̆ jang vă akŏm jơhngâm jang mă ‘lơ̆ng, athei tơplih ming đon tơchĕng vă dôm tơring tơlĕch jang kiơ̆ vă rim anih jang đơ̆ng Trung ương truh tơ̆ tơring bơ̆ jang trŏ hơnăp jang đei pơjao.