Mŭk drăm, tơpôl dêh char Đắk Lắk lơ̆m khei 4 păng 4 khei blŭng sơnăm 2025 hơnơ̆ng jang tŏk pran ‘lơ̆ng, lơ tơdrong hơgăt jang đei ‘lơ̆ng hơiă, pơjing anih dơ̆ng kơjăp ‘lơ̆ng vă jang đei dôm tơdrong hơgăt jang tŏk lơ̆m sơnăm. Nơ̆r tơroi âu đei tơlĕch lơ̆m hop akŏm khei 4 kơ Anih vei lăng kon pơlei dêh char Đắk Lắk, pơgơ̆r pơgê (13/5). Mĭnh lơ̆m dôm tơdrong hơiă hlŏh jĭ tơdrong jang kơmăy kơmŏk tŏk pran, kơsô̆ jang tŏk tơ̆ rim anih jang kơmăy lơ̆m khei 4 tŏk hlŏh 12% pơting hăm khei âu sơnăm sơ̆, mă loi jang kơmăy kơmŏk pơm tơlĕch tơmam tŏk vă jê̆ 17%.

Dôm anih jang tơm nhen chĕh phe, pơsei, bier, unh hơyuh hơnơ̆ng jang xa sơđơ̆ng ‘lơ̆ng. Tơdrong choh jang xa, jang ‘long păng rong ka hơdang tŏk ‘lơ̆ng ‘năi. Ƀok Nguyễn Thiên Văn, Kơdră vei lăng kon pơlei dêh char Đắk Lắk kơplăh dang ei pơma hơdăh, rim anih jang athei akŏm jơhngâm hơmet pơ ‘lơ̆ng pơmat tat ăn tơdrong jang xa, hơtŏk jên tơlĕch jang đơ̆ng teh đak, hơmet ming trong pơm hla ar păng tơgŭm ăn anih tĕch mơdro, vă pơm ‘lơ̆ng ăn tơdrong jang atŏk tơiung mŭk drăm, tơpôl lơ̆m sơnăm 2025.