Tơ̆ 'măng tơƀơ̆p, ƀok pơtao teh đak Brunei chơt hơ-iă ƀôh tơdrong tơbôl đơ̆ng Việt Nam păng Brunei pơtoi hơtŏk 'lơ̆ng rŏ hloh 30 sơnăm kơ ou. Ƀok pơtao teh đak Brunei akhan, 2 teh đak oei đei lơ mŭk drăm kăl pơm jang, iŏk jang tơnăp hloh gah mŭk drăm đak dou hơyuh soh, pơgang hoă chơ̆t, choh jang xa, ka hơdang, tơmang pơhiơ̆, pơm tơlĕch tơmam drăm xa Halal. Gah sơkơ̆t jang hơdoi 2 pah, Thủ tướng Phạm Minh Chính pơtruh nơ̆r hăm Brunei pơtoi pơm trong hiôk ăn dôm anih jang mŭk drăm Việt Nam jang hadoi tĕch pơdro gah jang đak dou, pơgang hoă chơ̆t, tơmam xa; asong hla bar phep pơm jang ăn dôm duk rôp ka hơdang, kon pơlei jang rôp ka hơdang Việt Nam gơh chă rôp ka hơdang tơ̆ tơring đak dơsĭ Brunei; atŭm hăm noh tơgŭm Việt Nam asong chư̆ng chih, pơm tơlĕch tơmam drăm xa Halal păng iŏk yua tơdrong hiôk gah tơmam drăm pơm jang đơ̆ng Việt Nam.

Ƀơ̆t 'măng ou, 2 ƀok kơdră drơ̆ng nơ̆r pơtoi pơm jang đei jơnei Tơdrong jang hơtŏk Jang hadoi tôm tơdrong Việt Nam - Brunei jăl sơnăm 2023-2027, păng kơhret kơjăp hloh tơdrong tơbôl 2 pah lơ̆m khei năr truh.