Iung pơma tơ̆ hop akŏm, Thủ tướng Teh đak Phạm Minh Chính tơbăt, hop akŏm vă lăng hơlen tơdrong jang tĕch răt teh, hnam, dôm tơdrong tơnap tap, tơhlăk tơhlĭn; tơlĕch nơ̆r apĭnh iung jang hăm tơdrong tĕch răt teh hnam păng dôm tơdrong đei ƀơm truh vă atŏk kơtang tơdrong mơdro sa tĕch răt teh hnam hơnơ̆ng đei atŏk tơ iung ‘lơ̆ng hơ iă, kơjăp ‘lơ̆ng.

Thủ tướng athei rim bơngai tang măt pơma dơnuh hơlen hơdăh dôm tơdrong tơm pơm ăn au to; đơ̆ng noh tơlĕch trong jang atŏk tơ iung tơdrong mơdro sa tĕch răt teh hnam trŏ ƀlep hăm trong bơ̆ jang, khôi luơ̆t kơ Đảng, Teh đak, kiơ̆ trong jang mơdro sa, pơchoh trong tơpôl hơtŏ hơnơ̆ng. Kiơ̆ Thủ tướng, đơ̆ng rŏng hop akŏm au, Khul kơdră teh đak gô pơjing Tơdrong tơchơ̆t đơ̆ng Khul kơdră Teh đak găh tơdrong mơdro tĕch răt teh hnam. Đơ̆ng noh, pơm trong kơnăl vă atŏk kơtang hơnih mơdro sa tĕch răt teh hnam atŏk tơ iung sơđơ̆ng păng kơjăp, ‘moi kiơ̆ ‘lơ̆ng hơ iă đei iŏk yua ‘lơ̆ng liĕm ƀar păh Teh đak, kon pơlei, hơnih mơdro sa, đei iŏk yua trŏ lăp, đei tơdrong hơlêm dih băl.