Tơ̆ Hop akŏm, rim bơngai tang măt hlôi tơƀôh hơdăh dôm tơdrong jang ‘lơ̆ng păng tim mă ‘lơ̆ng nhen bơ̆ jang hla bơar khôi luơ̆t oei tơhlăk tơhlĭn, mă kăl tơdrong chă răt, pơgơ̆r tơchă bơngai tơmơ̆t jên jang, jang hơdoi hơnih mơdro sa, vei lăng, iŏk yua mŭk drăm teh đak.

Tơdrong bơ̆ jang kơ hơnih jang pơgang tơring, hơnih jang pơgang tang găn hơlau pơrang jĭ oei tim mă ‘lơ̆ng; tơdrong hrăt hrot hnam pơgang tim mă hơmet pơ ‘lơ̆ng. Iung pơma tơ̆ hop akŏm, Thủ tướng Teh đak Phạm Minh Chính hôn bơnê dôm tơdrong iŏk đei mă hơnih bơ̆ jang pơgang iŏk đei lơ̆m khei năr au ki, pơtruh nơ̆r hmach chơt hơ iă hlŏh truh khul jang pơgang ƀlep lơ̆m năr 27/2. Lơ̆m khei năr kơnh, Thủ tướng athei hơnih bơ̆ jang pơgang hơnơ̆ng kiơ̆ yok dôm tơdrong jang ‘lơ̆ng, jang kiơ̆ ‘lơ̆ng rim trong tơlĕch jang đơ̆ng Đảng găh vei lăng năng tông jơhngơ̆m jăn ăn kon pơlei păng bơ̆ jang vei lăng măt bơngai lơ̆m chăl hle. Thủ tướng jei tơƀôh hơdăh dôm tơdrong jang tim mă ‘lơ̆ng, tơdrong tơnap tap kăl iung jang kơtang hloh dơ̆ng vă hơmet pơ ‘lơ̆ng.