Tơdrong ming man Jăl trong tơroh tơring Hòa Bình - Hà Nội păng jăl trong kơdâu renh Sơn La (Hòa Bình - Mộc Châu) hăm kơsô̆ jên axong jang 4.120 tih hlj păng trong ataih jê̆ 50km gô pơjing jăl trong vih vơ̆t kăp gĭt, tơroh dôm jăl trong tơm, tơgŭm pơm kơđeh jăl trong vih vơ̆t đơ̆ng Hà Nội – pơlei tơm Hòa Bình – Kim Bôi, hơtŏk tơdrong hiôk tơroh, tĕch pơdro kơ dôm dêh char Hà Nam - Hòa Bình - Phú Thọ - Sơn La hăm pơkăp trong nơnăm dơnơm kơ teh đak. Pơma ăh jơ lêh, Thủ tướng teh đak bơ̆n Phạm Minh Chính pơkăl, hăm dôm anih iŏk ming man, anih tơgŭm jang athei pơm jang khŏm mă đei pơkăl tơlĕch hăm tơdrong pơm kiơ̆ Tơdrong ming man pơkăl trŏ nhen pơkăp. Thủ tướng pơkăl Anih tơm jang găh Trong nơnăm pơdŭ tơmam drăm, dôm anih jang đei tơrĕk jang atŭm kơjăp hăm dêh char Hoà Bình vă dăh tom tơgŭm, pơtho mưh đei tơdrong kăl, vei xơđơ̆ng tơdrong pơm kiơ̆ Pơkăp jang gơh trŏ nhen hlôi tơlĕch tơchơ̆t.