Tơ̆ hop akŏm, Tĭnh uy Đăk Lăk hlôi tơbang tơchơ̆t pơjing Hơnih jang Hơlen Tĭnh uy kiơ̆ pơkăp tơmơ̆t hơdai Hơnih jang Hơlen Tĭnh uy Đăk Lăk păng Phú Yên. Ƀok Trần Trung Hiển, jang lơ̆m Tĭnh uy đei pôk jang Kơdră Hơnih jang Hơlen Tĭnh uy. Gah hơnih jang Đảng, Đảng ƀô̆ dôm hơnih jang Đảng dêh char, jăl jang 2020–2025 đei tơ-iung pơjing, kơyuơ yă Cao Thị Hòa An, Phŏ Bí thư Hơnih jang Tĭnh uy, Kơdră Hô̆i đŏng kon pơlei dêh char pơm Ƀĭ thư Đảng uy. Ƀok Tạ Anh Tuấn, Phŏ Ƀĭ thư Tĭnh uy, Kơdră Hơnih jang vei lăng kon pơlei dêh char đei pôk jang Ƀĭ thư Đảng uy dêh char.

Hơnih chih Hla bar tơroi păng Rađiô rapor – Pơdah tivi Đăk Lăk đei tơmơ̆t hơdai jing minh hơnih jang, yă Đào Phạm Hoàng Quyên jang Kơdră dơnơm chih hơlen hơmet tơdrong kơtơ̆ng ang. Pơma ah hop akŏm, Ƀĭ thư Tĭnh uy Nguyễn Đình Trung pơgơ̆r rim jăl jang, hơnih jang đảng păng rim hơnih jang tơroi tơbăt, drơ̆ng nơ̆r gah asong kan ƀô̆ pơm jang, bơngai jang lơ̆m minh hơnih pơm jang, pơjing đei tơdrong pơlong, khŏm mă ưh keh đang sơnong jang chinh trĭ lơ̆m jăl jang 'nao.