Hơtuch khei 3/1975, ƀât mă tơdrong tơblăh tơ̆ tơring găh Pơbăh tơplih tôch hrĕnh, Đại tướng Võ Nguyên Giáp đei nơ̆r pơtho ăn Anih chĕp kơ̆l Khul linh Quân khu 5 păng Anih chĕp kơ̆l Khul linh đak dơsĭ tơlĕch trong jăh tơblăh iŏk rơngei achon kông Trường Sa. Đơ̆ng rŏng kơ ‘nŏh, 1 khul linh bơ̆ jang tơdrong jang tôch gĭt kăl đei pơjing, đei khul linh Lữ đoàn 126 Đặc công linh đak dơsĭ vang jang hơdoi hăm khul linh tơblăh tơ̆ teh, khul linh roi tơbăt, dôm khul linh vang pơvih pơvăn găh Quân khu 5. 

Vă pơm ‘lơ̆ng, ưh đei bu băt, tơblăh ưh ê, lơ ƀato chơ linh đei pơm jing ƀato rôp yâu ka teh đak đe. Ƀô đô̆i ôn tơ̆ lăm mong tơmam, khŏm yak ƀât đak dơsĭ pŏh yă tôch hơmơt. Kơsơ̆ ‘năr 13/4/1975, lơ ƀato đơ̆ng bơ̆n hlôi tơ̆ tơ̆ achon kông Song Tử Tây. Til pơgê hrôih năr đơ̆ng rŏng, khul linh đặc công tơ̆ đak, ƀô đô̆i hrơ̆ch vang iung tơblăh, pơih tơdrong tơblăh tôch hrĕnh tŏk tơ̆ achon kông. Mă đơ̆ng đei tơdrong tơblăh plơ̆ tôch krưp krĕnh đơ̆ng hơyăt ră mă lei gơnơm tơdrong vang tơblăh tôch kơjăp, păng pơih tơblăh ưh ê, lăp đơ̆ng rŏng 30 pơnĭt tơblăh, khul linh bơ̆n hlôi iŏk vei lăng đĭ đăng achon kông Song Tử Tây. ‘Nŏh jĭ jơva ƀrâm đôh pơih blŭng ăn tơdrong tơblăh iŏk rơngei đĭ đăng achon kông Trường Sa.

Ƀok Trần Đăng Ninh, 70 sơnăm, pơlei tơ̆ Hải Hậu, Nam Định, linh đặc công so vang tơblăh tơ̆ âu, čhưu jơhngâm ƀlŏk dơ̆ng: “Tơdrong tơblăh ‘nâu tôch srĕp, ưh ê tŏk tơblăh tơ̆ kông, găh khul linh Sài Gòn ưh ê bơ̆n tơblăh tơdrŭt hrĕnh thoi noh. Kơplăh doh, tơdrong tơblăh tơ̆ kông oei đei lơ tơdrong ưh sơđơ̆ng, tơ̆ đak dơsĭ lơ ƀato hơyăt dăr joang hơnơ̆ng, ƀât lăp đei hloi tơdrong chă trong tơblăh tơgar iŏk đơ̆ng khul linh đơ̆ng 'ngoăih hai. Đơ̆ng rŏng kơ 'năr 14/4, khul linh đặc công nhôn oei hloi tơ̆ noh vă vei lăng achon kông, oei linh jĭ rơka, pơnă linh 'nŏh chơ vih tơ̆ Đà Nẵng”.

Tơgĕch ƀât tơdrong tơblăh oei jơnei, ‘năr 21/4/1975, khul linh ƀato mă 2 hơnơ̆ng yak klĕch đak dơsĭ poh yă, tŏk tơblăh iŏk rơngei dôm achon kông Sinh Tồn, Nam Yết, Trường Sa, Sơn Ca… ‘Năr 29/4/1975, đĭ đăng kông găh chon Trường Sa hlôi đei tơblăh iŏk rơngei. Trung úy Nguyễn Văn Mỹ, linh dăr joang găh Sư đoàn 2 kơ Lữ đoàn 126 tơroi dơ̆ng, kơsơ̆ ‘năr 30/4, rim bơngai kơtơ̆ng đĭ tơblăh iŏk rơngei Sài Gòn bơih kiơ̆ đơ̆ng Tơdrong kơtơ̆ng ang gĭt kăl đơ̆ng Radio nơ̆r pơma Việt Nam, lơ̆m jơhngâm čhôk ‘nă pă băt dang yơ:

“Ƀât dŏh sơ̆, nhôn oei tơ̆ achon kông Song Tử Tây, chă pơma nuh hăm bơngai tơ̆ kông tôch pơmat. Mưh Radio nơ̆r pơma Việt Nam roi tơbăt hlôi tơblăh iŏk rơngei đĭ đăng tơring pơbăh, hơtol Hla kơ kơpal bơbŭng Hnam Độc Lập, ‘nhŏng oh chơt hơiă pă băt dang yơ. Mưh băt hlôi tơblăh iŏk rơngei, nhôn oei arih ƀôh tôch ‘mêm mơnat kơ bôl boăl hlôi lôch tang lăp 2,3 jơ adrol kơ tơblăh rơngei đĕch.”.

Đơ̆ng rŏng 50 sơnăm iŏk đei rơngei, apŭng achon kông Trường Sa hrei ‘nâu oei jang tŏk tôch pran kiơ̆ trong jang mŭk drăm tơ̆ đak dơsĭ kơ teh đak, jĭ plei nuih tŏk bŏk Đak dơsĭ Biển Đông, tơgop pơm hơtŏk anih dơ̆ng ăn teh đak lơ̆m lakak đak dơsĭ apŭng plenh teh. Ƀok Nguyễn Tấn Tuân, Kơdră vei lăng kon pơlei dêh char Khánh Hòa tơroi, tơ̆ hơnăp kơnh, dêh char hơnơ̆ng hơmet pơ 'lơ̆ng anih jang chinh trĭ, pơm hơtŏk tơdrong arih xa ăn khul linh păng kon pơlei tơ̆ dôm achon kông; hơtŏk tơdrong tơroi tơbăt, hơtŏk đon hlôh vao găh Trường Sa lơ̆m tơpôl. Ƀok Nguyễn Tấn Tuân pơma hơdăh, đon pơhnŏng 'nŏh jĭ hơnhăk Trường Sa jing anih jang mŭk drăm, tơpôl 'lơ̆ng rŏ tơ̆ tŏk bŏk đak dơsĭ biển Đông, atŭm hăm 'nŏh jing Kơđông pran kơjăp vă vei lăng 'lơ̆ng tơdrong pơm tơm kơ teh đak:

“Vei lăng mă ‘lơ̆ng, 1 păh ‘nŏh jĭ dôm tơdrong tơgŭm, tơdrong nai dơ̆ng ‘nŏh athei pơjing trong jang xa đei iŏk yoa kơjăp ăn kon pơlei jang ka. Rim unh hnam vang jang xa hai, vang vei lăng ‘lơ̆ng tơdrong pơm tơm tơ̆ achon kông đak dơsĭ hai. Khul linh đak dơsĭ teh đak, dêh char Khánh Hòa vang vei lăng năng tông apŭng tơ̆ achon kông âu. 'Nŏh jĭ tơdrong pơlung tih tên, vă rim bơngai đơ̆ng kông kŭm nhen tơ̆ achon kông ƀôh tơdrong kăp gĭt hlŏh jĭ tơdrong pơm tơm, rơngei hiôk hian kơ teh đak”.