‘Nhŏng Siu Pôp (hơdrung Jarai) oei lơ̆m pơlei Anh, tơring Ia Bang, apŭng Chư Prông, dêh char Gia Lai, jĭ kŏng nhân Mir đak lar Hòa Bình, Kŏng ty ksu Chư Prông tơbăt, hơnih ou đei hloh 260 ‘nu kŏng nhân bơngai kon kông, tơmơ̆t 92% akŏp măt bơngai jang lơ̆m mir đak lar. Lơ̆m “Khei kŏng nhân” sơnăm 2025, Kŏng ty hlôi pơgơ̆r lơ tơdrong jang kơtang, ‘lơ̆ng hơ iă vă vei lăng năng tông tơdrong hơrih sa ăn bơngai jang. “Đơ̆ng mă mơ̆t pơm kŏng nhân ksu, đei tơdrong tơgŭm djru păng pơtho tơbăt đơ̆ng khul kơdră, nhôn jang kiơ̆ ƀlep trong jang păng hơnhăk đei iŏk yoa sơđơ̆ng. Dang ei, tơdrong hơrih sa kơ kŏng nhân ksu lơ hloh kơsơ̆; đơ̆ng jên sŏng sa, tơdrong răt yoa lơ̆m ŭnh hnam đei hơmet pơ ‘lơ̆ng. Pơlei pơla đei tơplih kơtang, ŭnh hơyuh pơm hơdăh ang rang ‘lơ̆ng. Dang ei trong jei hlôi đei ming man ‘lơ̆ng. Sơ̆ tơnap tap dêh, hnam hơgrêng hơgrang, mă lei dang ei hnam ‘lơ̆ng liĕm, tơdrong hơrih sa pha kơsơ̆ bơih”.

Đei băt, lơ̆m “Khei kŏng nhân” sơnăm ou, Jơnŭm vei lăng bơngai jang dêh char Gia Lai hlôi pôk ăn kon jên tơgŭm djru tơ iung pơjing ming man, hơmet ming 25 pơbŭng hnam “Pơbŭng hnam tơnŏ Kŏng đoàn" ăn bơngai jang hơrih sa oei mơmat tat.