Hơdrô̆ tơdrong jang “Khei pêng tơring sơlam” kơ Trung ương pơgơ̆r tơ̆ 3 dêh char Lạng Sơn, Quảng Trị păng Kiên Giang. Tơdrong jang “Khei pêng tơring sơlam” akŏm tŭn pran tơroi tơbăt, pơtho pơhrăm ăn Đoàn viên, bơngai jang lơ̆m khŭl, hơdruh tơdăm găh tơdrong joăt joe, tơdrong ‘mêm kơ eng pơlei pơla teh đak păng hơnăp jang đơ̆ng sơnăm mơ lôh hăm tơdrong pơm tơm, vei sơđơ̆ng tơring sơlam, achon đak dơ sĭ.

Tơ̆ âu, đei lơ tơmam gô đei Anih pơgơ̆r pơjao hơpăh ăn kơ khŭl linh vei lăng tơring sơlam, kon pơlei păng hơdruh tơdăm hơioh dôm tơring tơtil sơlam teh đak 3 dêh char Lạng Sơn, Kiên Giang, păng Quảng Trị nhen: asong tơmam ăn ŭnh hnam teh đak tơgŭm păng hŏk tro đei tơdrong arih sa mơmat tat, asong hla kơ Teh đak ăn kơ dôm ŭnh hnam vei lăng trong sơlam, tơgŭm ‘long kram ăn tơdrong jang “Tơm kram tơring sơlam Việt”. Mă loi ‘noh tơlĕch jang dôm tơdrong jang “Tơ̆k hơdăh trong sơlam”, trong iĕ chă năm dăr hơlen jrăng sơlam, “Trong ‘lơ̆ng ăn kơ oh”, tơdrong jang “Hnam chă pơ yơ̆ng ăn kơ oh”... Đei kơ jă dôm tơmam, tơdrong jang lơ̆m Tơdrong jang ‘noh hloh 7,2 ti hlak jên.