Sơnăm ‘nâu, lơ hnam trưng Đại học, cao đẳng đei tơdrong hơmet ming trong rơih hŏk tro kơna hŏk tro truh năr chă hơlen lăng tơdrong ‘nâu lơ hloh kơ dôm sơnăm hơdrol.

Khŭl kơdră chĕp kơ̆l hnam trưng păng thây kô pơtho dôm hnam trưng klăih song jing dôm grŭp tơdrong jang: khoa học xã hội, khoa học tự nhiên, kinh tế, kỹ thuật… vă roi tơƀôh ăn hŏk tro rim tơdrong jang, trong hŏk, hnam trưng pơtho, tơdrong hiôk vă đei tơdrong jang đơ̆ng rŏng kơ hŏk đang.... Vă hơdăh hloh dơ̆ng, rim hnam trưng đại học, cao đẳng tă kơ đei hơnih pơtho tơƀôh hơdrô̆, ling lang pơtho tơƀôh, tơl nơ̆r apĭnh đơ̆ng hŏk tro păng pơtho rơih tơdrong jang mưh pơm hla ar pơlong mơ̆t hŏk đại học, cao đẳng sơnăm 2023.