Dôm năr ‘nâu, ƀok Rơ Com Reng tơ̆ plt Pleiku, dêh char Gia Lai tôch kơ sơ ‘ngon, ‘mêm kơ jên đơ̆ng rŏng kơ đĭ đăng 126 triu hlak jên đơ̆ng tĕch cheh phe kơ unh hnam pŭh nơ̆r đe hơlĕnh pơgŏh lăp đơ̆ng rŏng 2,3 pơnĭt đĕch. Ƀok tơroi, ƀât 1 kơsơ̆ hơtuch khei 3/2025, ƀok iŏk đei điên thoăi đơ̆ng 1 ’nu bơngai akhan, sư jĭ bơngai jang tơ̆ anih unh điên, athei kla jên điên păng pơhlŭ inh kla kiơ̆ trong trư̆k tuyê̆n vă ƀônh. Lui kiơ̆ nơ̆r pơma, roi tơƀôh tôch hơlen đơ̆ng bơngai hơlĕnh, ƀok pơm kiơ̆ păng ưh ê tơgŭm ăn bơngai hơlĕnh pơdăr iŏk pơđĭ jên lơ̆m tai khoan ƀok hloi:

“Lu sư khan iŏk điên thoăi mon (kon drŏ kăn ƀok Reng) pơtho taih iŏk app găh anih jang unh điên. Oei kơmăy kơdih ‘nŏh kuay (krao video), pơtho tôch hơlen nôp jên thoi âu thoi to. Đơ̆ng rŏng kơ ‘nŏh kuay hơlen muh măt, phĭn mã QR. Kon drŏ kăn inh năng hơlen jên lơ̆m tai khoan ‘nŏh ƀôh hiong 126 triu, ưh pă đei yă 1 hlak kiơ”.

Đơ̆ng blŭng sơnăm 2025 truh dang ei, lơ̆m dêh char Gia Lai đei 14 tơdrong hơlĕnh pơdăr kiơ̆ mang internet hăm kơsô̆ jên truh 12,9 ti. Hơdrô̆ tơdrong hơlĕnh ya pơm bơngai jang tơ̆ Anih jang unh điên ‘nŏh đei 6 ‘nu bơngai năm tơroi, hiong vă jê̆ 400 triu. Kiơ̆ kơsô̆ chih jô̆ đơ̆ng Anih vei lăng sơđơ̆ng mang păng tang găn tơdrong yoch hăm kơmăy kơmŏk ‘nao – Công an dêh char Gia Lai, 3/4 ‘nu bơngai puh ‘nŏh jĭ drŏ kăn păng 1/3 kơsô̆ tơdrong yoch đei tơ̆ plt Pleiku. Vă rim tơdrong pơtơm đei đơ̆ng mang tơpôl ngăl, mă lơ ‘nŏh đơ̆ng tai khoan ya lơ̆m Facebook kiơ̆ đơ̆ng tơroi kuang kăo, pơhlŭ đe tơmât jên jang mă ưh ‘nŏh ya kơtum kơtŏng ‘nhŏng oh, anih jang kơpal. 1 tơdrong pơm ăn tơdrong hơlen năng jing mơmat ‘nŏh đei lơ tài khoản tăh jên hơlenh ‘nŏh jĭ tài khoản anih tĕch mơdro. Mă lei tài khoản ‘nâu đe đa thuê mă ưh ‘nŏh răt hăm hla ar ya, jing tôch pơmat tat vă tang găn, mă loi ‘nŏh mưh jên gơih hơlơ̆k hơle lĕch tơ̆ teh đak đe, lăp dang 2,3 phŭt đĕch.

Dang ei khul linh công an dêh char jang hơdoi hăm dôm Anih mong jên tih nhen Vietcombank, BIDV, MBBank… vă pơm hơdăh dôm tài khoản đei jâu, rôp gơ̆t jên păng tơgŭm iŏk pơdreu dơ̆ng jên hiong. Gơnơm thoi noh, lơ̆m sơnăm 2024 păng ƀât blŭng sơnăm 2025, hlôi iŏk pơdreu păng kla ăn bơngai hiong hlŏh 10 ti đơ̆ng dôm tơdrong hơlĕnh pơdăr thoi âu. Mă lei, oei đei lơ tơdrong pơmat tat mưh jang hơdoi, mă loi hăm dôm anih mong jên tơ̆ ‘ngoăih kơ dêh char.

Thiếu tá Phạm Học – kăn ƀô̆ dăr hơlen găh Anih vei lăng sơđơ̆ng mang păng tang găn tơdrong yoch hăm kơmăy kơmŏk ‘nao - Công an dêh char Gia Lai ăn tơbăt: “Dôm bơngai ƀônh hli tăr văr, đa gơih jên hơnơ̆ng, gơih jên lơ, nhôn athei anih mong jên tơtom rôp gơ̆t, khan ăn kon pơlei băt. Atŭm hăm ‘nŏh pơma nuh hăm kăn ƀô̆ tơ̆ anih jang vă tơl tơblang păng tơtom tang găn. Mă lei đei 1,2 anih mong jên tĕch mơdro tơ̆ ‘ngoăih kơ dêh char, vang roi tơbăt hiơ̆ hyĭn, pơm pơmat tat ăn tơdrong dăr hơlen, chă trong đe gơih jên, chă bơngai pơm yoch”.

Anih vei lăng sơđơ̆ng mang păng tang găn tơdrong yoch hăm kơmăy kơmŏk ‘nao – Công an dêh char Gia Lai tơtă ăn kon pơlei athei vei kơjăp '4 ưh – 4 athei pơm' nhen 1 pôm khêl vă vei lăng kơdih kâu tơ̆ hơnăp tơdrong yoch hăm kơmăy kơmŏk. 4 ưh đei: Ưh đei pơm kiơ̆ nơ̆r athei đơ̆ng bơngai ưh kơjuăt hăm điên thoăi dăh mă mang tơpôl; Ưh đei pơm boăl juăt hăm bơngai ưh băt đơ̆ng yơ lơ̆m mang tơpôl, mă loi ‘nŏh lơ̆m Facebook; Ưh đei ham mưh mơ̆ng kiơ̆ nơ̆r đe akhan jang hơ ‘yơch, jên khei lơ, tơmât jên jang ƀônh đei lơi; Ưh đei roi tơbăt rim tơdrong ƀơm truh kơdih, kơsô̆ tài khoản, mã OTP, dăh mă krao video mưh tam mă băt hơnăn đe.

4 athei ‘noh: Athei hơlen năng mă nhen rim tơdrong adrol kơ gơih jên, jô̆ hloi hăm bơngai juăt; Athei kơchăng mưh yoa mang tơpôl, pơma nuh hăm bơngai ưh kơjuăt; Athei tơroi ăn công an dăh mă kơtum kơtŏng ‘nhŏng oh tơdăh jâu đei hơlĕnh; Athei hơlen năng mă nhen rim tơdrong adrol vă tơlĕch jên jang xa, răt tơmam trư̆k tuyê̆n. 

Thượng tá Đinh Văn Sơn – Phŏ Kơdră Anih vei lăng sơđơ̆ng mang păng tang găn tơdrong yoch hăm kơmăy kơmŏk ‘nao, Công an dêh char Gia Lai ăn tơbăt: “Nhôn hơnơ̆ng roi tơƀôh ăn Kơdră chĕp kơ̆l công an dêh char tơlĕch lơ tơdrong bơ̆ jang, pơtho ăn dôm khul linh tơ̆ tơring mă loi jĭ công an tơ̆ tơring hơnơ̆ng bơ̆jang ‘lơ̆ng, vei lăng rim tơdrong vă tơtom chă ƀôh, băt tơdrong pơm glăi. ‘Ngoăih kơ ‘nŏh, nhôn hơnơ̆ng hơlen năng hlôh vao rim trong hơlĕnh pơdăr đơ̆ng bơngai pơm yoch vă roi tơbăt ăn kon pơlei, kơchăng tang găn, jang hơdoi hăm dôm khul linh lơ̆m păng ‘ngoăih kơ công an vă tang găn tơdrong yoch hăm kơmăy kơmŏk ‘nao; păng iŏk yoa dôm kơmăy kơmŏk ‘nao rơgei vă tang găn ‘lơ̆ng, đei yoa hăm dôm tơdrong yoch ‘nâu”.

Ƀât mă kơmăy kơmŏk kơsô̆ oei tŏk pran rim năr, ‘ngoăih kơ đon kơchăng, tơdrong dăr hơlen đơ̆ng anih jang kơpal, ‘nŏh athei đei đon răng păng kơchăng đơ̆ng rim kon pơlei hai. ‘Noh jĭ khêl tang ‘lơ̆ng hlŏh vă vei lăng kơdih kâu păng unh hnam tơ̆ hơnăp dôm tơdrong hơlĕnh pơdăr đơ̆ng khul pơm yoch lơ̆m mang./.