Kơ sơ̆ 21/2 tơ̆ Anih bơ̆jang Trung ương Đảng, Tổng Bí thư Nguyễn Phú Trọng hlôi sơng khŭl tang măt gĭt kăl Đảng Khŭl găh ‘ngiĕo mĭnh ƀơ̆r đon (MIU), yua đơ̆ng Tổng Bí thư Mi-ghen Mê-hi-a, Kơdră tơm vei lăng Trong jang tơgŭm mơ̆t jang hơdai lơ̆m tơring Cộng hòa Dominica, chĕp kơ̆l khŭl năm ngôi păng bơ̆jang tơ̆ Việt Nam, đơ̆ng ‘năr 18/02 truh ‘năr 26/02/2023.

Tơ̆ jơ sơng, Tổng Bí thư Nguyễn Phú Trọng pơma hơdăh Đảng, Teh đak Việt Nam ling lang lăng kăl tơdrong pơvei tơbôl, jang hơdai lơ tơdrong hăm rim teh đak, rim đảng đei pơvei joăt joe, lơ̆m noh đei Cộng hòa Dominica păng Đảng MIU. Tổng Bí thư Nguyễn Phú Trọng hôn bơnê tơdrong pơvei jang hơdai kơjăp păng roi ‘năr roi đei yua đơ̆ng Đảng Cộng sản Việt Nam hăm Đảng MIU păng dôm đảng gĭt kăl nai tơ̆ Cộng hòa Dominica. Tổng Bí thư athei 2 păh hơnơ̆ng jang hơdai kơjăp, tơlĕch jang đei yua dôm trong vă jang chĭnh trĭ ‘lơ̆ng hơiă ‘noh jĭ tơdrong ‘lơ̆ng păng hiôk vă 2 teh đak pơih să păng pơm ‘lơ̆ng hloh dôm tơdrong jang hơdai đơ̆ng 2 teh đak.