Tơ̆ pơma dơnuh, Tổng Bí thư Tô Lâm sơkơ̆t hơdăh Việt Nam drơ̆ng iung jang hloi pơm gơng tơroh kloh klĕch ƀar păh Hungary hăm tơring Đông Nam Á păng lăng Hungary jĭ ‘măng jang gĭt kăl hloh vă atŏk kơtang jang hơdoi hăm tơring Trung Đông Âu păng EU. Ƀar ‘nu kơdră chĕp pơgơ̆r drơ̆ng mĭnh nơ̆r hơnơ̆ng atŏk kơtang hloh dơ̆ng lui yom dih băl chinh trĭ păng tơgoăt kơjăp ƀar teh đak, ƀar Đảng chĕp kơ̆l, pơtrŭt kơtang ăn khul kơdră kơpal tơƀơ̆p pơma dơnuh dih băl, atŏk kơtang jang hơdoi lơ̆m dôm tơdrong jang kăl mơdro sa-tơmơ̆t jên jang-kmăi kmŏk, tơplih ‘nao tơchăr, pơtho pơhrăm…; pơma hơdăh vei lăng sơđơ̆ng teh đak-sơđơ̆ng dơ̆ng kơjăp kăl jing tơdrong tơm ‘nao lơ̆m jang hơdoi ƀar teh đak păng ƀar păh kăl atŏk kơtang ăn kon pơlei năm ngôi dih băl, tơgop atŏk kơtang hlôh vao dih băl ƀar păh ƀar hơdrĕch hơdrung. Ƀar ‘nu kơdră chĕp pơgơ̆r drơ̆ng nơ̆r Việt Nam hăm Hungary tơgŭm djru trong jang xek tơlang rim tơdrong tơgar dih băl hăm trong rơngei hiôk hian, ‘moi kiơ̆ lui yom khôi luơ̆t apŭng plĕnh teh, tơgop pơm rơngei hiôk hian, sơđơ̆ng, dơ̆ng kơjăp lơ̆m tơring păng lơ̆m apŭng plĕnh teh.