Pơgê năr 20/12, tơ̆ Hơnih tơm Hop akom Teh đak (Hà Nội),  Khul kơdră chĕp pơgơ̆r Trung ương Đảng, Kuô̆k hô̆i, Kơdră chĕp pơgơ̆r Teh đak Cộng hòa xã hội chủ nghĩa Việt Nam, Hơnih bơ̆ jang Trung ương Mặt trận Tổ quốc Việt Nam păng Quân ủy Trung ương, Hơnih tơm Ƀô̆ đô̆i pơgơ̆r pơm lêh tơbăt 80 sơnăm Năr pơjing Khul Ƀô̆ đô̆i kon pơlei Việt Nam, 35 sơnăm Năr lêh Đĭ đăng kon pơlei vang vei lăng Teh đak. Tổng Bí thư Tô Lâm đŏk tơbăt tơ̆ pơm lêh tơbăt, pơma hơdăh: năr 22 khei 12 sơnăm 1944, Đội Việt Nam tuyên truyền Giải phóng quân - jĭ hơnih tơm kơ Khul Ƀô̆ đô̆i kon pơlei Việt Nam đei pơjing. Hăm tơdrong chĕp pơgơ̆r, pơtho pơhrăm đơ̆ng Đảng păng Ƀok Hô, Ƀô̆ đô̆i bơ̆n hlôi atŏk tơ iung tĕnh koăng, hơnơ̆ng đei jơnei tih tên. Lơ̆m prăt chăl sơnăm, Khul Ƀô̆ đô̆i hơnơ̆ng atŏk kơtang jơhngơ̆m đon kĕch mang, pơm tơm, atŭm hăm kon pơlei vang vei lăng pơm tơm kơdih, teh đak rơngei keh kong, vei lăng năng tông Đảng, vei lăng năng tông Khul kơdră chĕp pơgơ̆r, Vei lăng Kon pơlei păng chăl chĕp pơgơ̆r xã hội chủ nghĩa. Hrei ou, lơ̆m chăl kĕch mang hle, Tổng Bí thư pơma hơdăh trong jang, tơdrong tơm hloh vă Khul Ƀô̆ đô̆i kon pơlei hơnơ̆ng jang keh đang pran kơtang rim tơdrong jang, atŭm hăm Đảng, hăm kon pơlei, pơ đĭ ƀô̆ đô̆i bơ̆n iŏk đei jơnei ‘nao lơ̆m tơ iung pơjing păng vei lăng Teh đak xã hội chủ nghĩa ‘noh jĭ vei kơjăp iăp kơtang păng atŏk kơtang tơdrong chĕp pơgơ̆r kơtă tôm tong đơ̆ng Đảng, tơdrong vei lăng, chĕp pơgơ̆r đơ̆ng Teh đak hăm Khul Ƀô̆ đô̆i kon pơlei păng tơdrong jang hơmet pơ ‘lơ̆ng sơđơ̆ng dơ̆ng kơjăp teh đak.