Ƀan châ̆p hanh Trung ương Đảng Cộng sản Việt Nam, Kuôk hô̆i teh đak Cộng hòa xã hội chủ nghĩa Việt Nam, Kơdră teh đak Cộng hòa xã hội chủ nghĩa Việt Nam, Jơnŭm pơgơ̆r teh đak Cộng hòa xã hội chủ nghĩa Việt Nam, Anih jang Trung ương Măt trâ̆n tôh kuôk Việt Nam păng unh hnam ơh ol tơroi tơbăt: Ƀok Trần Đức Lương, sơ̆ jang lơ̆m Anih tơm Chĭnh trĭ, Kơdră so kơ teh đak Cộng hòa xã hội chủ nghĩa Việt Nam, sơ̆ jang Kơdră Jơnŭm Vei sơđơ̆ng tơpôl teh đak, rơneh năr 5/5/1937; pơlei pơla tơ̆ xah Phổ Khánh, apŭng Đức Phổ (dang ei noh thĭ xah Đức Phổ), dêh char Quảng Ngãi; oei hơrih tơ̆ hnam kơsô̆ 298, trong Vạn Phúc, phương Liễu Giai, kuâ̆n Ba Đình, pơlei tơm Hà Nội.

Ƀok vang jang kăch mang đơ̆ng khei 2 sơnăm 1955; mơ̆t jang Đảng Cộng sản Việt Nam ah năr 19/12/1959; jang lơ̆m Ƀan châ̆p hanh Trung ương Đảng lơ̆m jăl 5, 6, 7, 8 păng 9; jang lơ̆m Anih tơm Chĭnh trĭ jăl 8, jăl 9; jang kơpal lơ̆m Anih tơm Chĭnh trĭ jăl 8; Phŏ Kơdră Jơnŭm jang đe Ƀô̆ trương đơ̆ng khei 2 sơnăm 1987 truh khei 9 sơnăm 1992; jang Phŏ Thủ tướng teh đak đơ̆ng khei 9 sơnăm 1992 truh khei 8 sơnăm 1997; đơ̆ng khei 9 sơnăm 1997 truh khei 6 sơnăm 2006 pơm Kơdră teh đak Cộng hòa xã hội chủ nghĩa Việt Nam, jang Kơdră Jơnŭm Vei sơđơ̆ng tơpôl teh đak, jăl 10, jăl 11; jang tang măt Kuôk hô̆i jăl 7, 8, 10 păng jăl 11.

Đơ̆ng rŏng kơ păn jĭ đunh khei năr, mă hlôi đei Đảng, Teh đak, jơnŭm đe yăo sư, thâi pơgang hơmet ming, unh hnam vei lăng tơnăp, mă lei kơyuơ sơnăm 'lŏ, jĭ ăl, ƀok kơtĕch jơhngơ̆m ah 10 jơ 51 pơnĭt kơmăng năr 20/5/2025 (trŏ ah năr 23/4 sơnăm Ất Tỵ), tơ̆ hnam kơdih, hơrih truh 88 sơnăm.

Lơ̆m hloh 50 sơnăm jang kăch mang, ƀok hlôi đei lơ tơgop tih tên hăm tơdrong jang kăch mang kăp gĭt kơ Đảng păng kon pơlei. Ƀok đei Đảng, Teh đak pôk ăn Mê đai Hơnglŏng Dreng, Mê đai 65 sơnăm jang Đảng păng lơ mê đai, tơmam hơpah kăp gĭt nai. Ƀok lôch hơchăng jing minh tơdrong hiong răm tih tên hăm Đảng, Teh đak, kon pơlei păng unh hnam Ƀok.

Vă tơƀôh đon bơnôh ƀlŏk băt kơ ƀok Trần Đức Lương, Ƀan châ̆p hanh Trung ương Đảng Cộng sản Việt Nam, Kuôk hô̆i teh đak Cộng hoà xã hội chủ nghĩa Việt Nam, Kơdră teh đak Cộng hòa xã hội chủ nghĩa Việt Nam, Jơnŭm pơgơ̆r teh đak Cộng hòa xã hội chủ nghĩa Việt Nam, Anih jang Trung ương Măt trâ̆n Tôh kuôk Việt Nam tơchơ̆t pơgơ̆r Pơdong Grong ƀŭ kiơ̆ pơkăp lơ̆m jơ̆p teh đak.