Lơ̆m jơnăr năm ngôi păng bơ̆ jang tơ̆ Lào, Khŭl tang măt Jơnŭm vei lăng hơdrĕch kon kông Kuôk hô̆i Việt Nam yua đơ̆ng Kơdră Jơnŭm vei lăng hơdrĕch kon kông Y Thanh Hà Niê K’đăm chĕp kơ̆l năm kơ kuh pơma dơnuh hăm Kơdră Kuôk hô̆i Lào Xaysomphone Phomvihane păng vang pơgơ̆r hop akŏm tơroi băl tơdrong hlôh vao găh tơdrong jang vei lăng hơdrĕch kon kông hăm Kơdră vei lăng Anih jang Dôm hơdrĕch kon kông Kuôk hô̆i Lào.

Tơ̆ jơ sơng, Kơdră Jơnŭm vei lăng Hơdrĕch kon kông Y Thanh Hà Niê K’đăm hlôi tơroi găh pơtôch jang hơdai đơ̆ng Jơnŭm vei lăng hơdrĕch kon kông Kuôk hô̆i Việt Nam păng Anih jang Dôm hơdrĕch kon kông Kuôk hô̆i Lào lơ̆m khei ‘năr âu ki, trong jang hơdai tơ̆ hơnăp kơnh păng găh tơdrong jang hơdai pơgơ̆r hop akŏm vang tơroi băl tơdrong hlôh vao găh tơdrong jang vei lăng hơdrĕch kon kông kơ 2 teh đak. Hơdrol ‘noh,  Jơnŭm vei lăng hơdrĕch kon kông Kuôk hô̆i Việt Nam păng Anih jang Dôm hơdrĕch kon kông Kuôk hô̆i Lào hlôi jang hơdai pơgơ̆r hop akŏm vang tơroi tơdrong kơ tơ̆ng ang, hlôh vao găh tơdrong jang pơ jing trong jang tơgŭm khôi luơ̆t păng dăr hơlen tơdrong tơlĕch jang kiơ̆ dôm trong jang tơgŭm găh tơdrong hơdrĕch kon kông, tơjur dơnuh hin kơjăp, hơtŏk tơiung tơring tơrang, sut pơ ngot tơjur dơnuh hin, pơm tơdrong jang sơđơ̆ng ăn kon pơlei... Việt Nam păng Lào hơtŏk loi dơ̆ng jang hơdai đơ̆ng dôm anih jang tơdrong jang vei lăng hơdrĕch kon kông.