Việt Nam-Thái Lan drơ̆ng mĭnh nơ̆r pơm hơtŏk tơgoăt tơgoăl jang Jang hơdoi tôm tong.
Thứ bảy, 06:00, 17/05/2025 VOV/Amazưt tơblơ̆ VOV/Amazưt tơblơ̆
VOV4.Bahnar - Tơ̆ ‘Măng hop akŏm, Ƀar Thủ tướng drơ̆ng mĭnh nơ̆r tơdrong kăl tơgoăt tơgoăl Thái Lan- Việt Nam tŏk jing Jang hơdoi tôm tong.

 

Năr 16/5, tơ̆ hơnih bơ̆ jang Kơdră chĕp pơgơ̆r Teh đak, Thủ tướng Teh đak Phạm Minh Chính hlôi pơm tơm Pơm lêh sơng Thủ tướng Thái Lan Paetongtarn Shinawatra. Lăp đơ̆ng rŏng pơm lêh, 2 Thủ tướng vang pơm tơm chĕp pơgơ̆r ‘Măng hop akŏm ‘măng mă 4, khul kơdră chĕp pơgơ̆r atŭm Việt Nam – Thái Lan. Tơ̆ ‘Măng hop akŏm, Ƀar Thủ tướng drơ̆ng mĭnh nơ̆r tơdrong kăl tơgoăt tơgoăl Thái Lan- Việt Nam tŏk jing Jang hơdoi tôm tong. Hơlen dơ̆ng tơgoăt tơgoăl 2 teh đak đơ̆ng rŏng 10 sơnăm pơjing tơbôl jang hơdoi kăl, Thủ tướng tơbăt 2 teh đak đei dôm trong hơ iă: Lui yom dih băl chinh trĭ ling lang tŏk kơtang, ăn khul kơdră năm ngôi dih băl đei tơlĕch jang kơtang. Jang hơdoi vei lăng sơđơ̆ng teh đak roi năr roi kơtang hlôi jing tơdrong tơm kăl hloh kơ 2 teh đak. Jang hơdoi Mŭk drăm, mơdro sa, tơmơ̆t jên jang tŏk kơtang pơ đĭ găh ‘lơ̆ng. Đơ̆ng sơnăm 2016 truh dang ei, Thái Lan jĭ teh đak jang hơdoi tih hloh kơ Việt Nam păng Việt Nam jing teh đak jang hơdoi dơ̆ng mă 2 kơ Thái Lan lơ̆m ASEAN, hăm tĕch mơdro dih băl sơnăm 2024 iŏk đei hloh 20 ti USD păng lăng truh 25 ti USD lơ̆m dôm sơnăm truh ou kơnh. Lăp đơ̆ng rŏng ‘măng hop akom mă 4, khul kơdră atŭm Việt Nam -Thái Lan, Thủ tướng Phạm Minh Chính hăm Thủ tướng Paetongtarn Shinawatra hlôi vang Pơm lêh tơplih dih băl hla bơar tơchơ̆t jang hơdoi ƀar păh rim Hơnih tơm, hơnih bơ̆ jang ƀar teh đak.

VOV/Amazưt tơblơ̆

Viết bình luận

TIN CÙNG CHUYÊN MỤC

Video