Ƀok Trần Quang Bình tơ ‘ngla mĭnh anih ming man tơ̆ Đắk Lắk, đei 5 tơdrong jang oei ming man ‘nŏh pơđĭ 5 tơdrong jang âu tơƀâp pơmat tat yoa ưh kơmăh chuơh ngăl. Mă đơ̆ng hlôi krao akŏm lơ anih juăt tech chuơh ră mă lei oei ưh kơmăh kiơ. Ƀok Bình tôch pơngơ̆t yoa anih jang sư oei dơ̆ng tơ̆ hơnăp tơdrong vă phak đơ̆ng bơngai tơmât jên jang yoa bơ̆ jang hiơ̆ hyĭn:

“Anih nhôn oei bơ̆ jang 1,2 tơdrong jang ming man tơ̆ Đắk Lắk păng Đắk Nông. Adrol ki, rim ‘măng krao chơ chuơh ‘nŏh đe chơ tuh lơ̆m năr hloi păng yă dang 300 rơbâu 1m³. Dôm năr tơjê̆ âu, krao anih kôch chuơh ‘nŏh đei băt yă chuơh đĭ tŏk đơ̆ng 70 - 80% bơih, mă lei ưh kơ đei chuơh vă răt. Yă chuơh tŏk ‘ngoăih kơ ƀơm kơnê̆ truh tơdrong jang ming man, sư oei ƀơm ưh ‘lơ̆ng truh khei ‘năr hơgăt ming man dơ̆ng. Tơdăh hiơ̆ ‘noh anih tơmât jên jang phak ba kơna apinh dôm anih jang kơpal jăh tơrek truh tơdrong ‘nâu.”

Kŭm nhen ƀok Trần Quang Bình mơ̆n, tơdrong yă chuơh tŏk tôch dêh kŭm đei tơ̆ lơ tơring ‘năi. Kiơ̆ tơdrong dăr hơlen tơ̆ plt Buôn Ma Thuột, dôm apŭng Cư M’gar, Krông Búk, Ea H’leo, thĭ xăh Buôn Hồ… ăn ƀôh chuơh vă man dang ei tŏk đơ̆ng 70 – 80%, ƀât lăp 1,2 tơring tŏk hlŏh 2 ‘măng pơting hăm đunh kơ âu 1 khei. Mŏ Tạ Bích Trâm, tơ ‘ngla anih tĕch tơmam ming man tơ̆ phường Tân Lợi, plt Buôn Ma Thuột, ăn tơbăt, dang 1 khei adrol ki, yă chuơh lăp dang 300 rơbâu hlak 1m³, ‘nŏh dang ei hlŏh 500 rơbâu hlak 1m³. Mă đơ̆ng yă chuơh “tŏk tôch dêh” mă lei lơ anih kŭm ưh đei chuơh vă tĕch ‘năi.

“Dang ei krao điên thoăi apinh răt chuơh roi pơmat, jô̆ hloi hăm anih nhôn, ưh kơ đei pơma kiơ kơ kon pơlei. 1 khei adrol ki inh krao ‘nŏh đe chơ truh hloi, hăm yă dang 300 rơbâu 1m³, mă lei dang ei đĭ hlŏh 500 rơbâu 1m³ bơih. Yă tŏk thoi nŏh ‘nŏh tôch pơmat hăm anih tĕch mơdro nhôn păng bơngai răt vă man hnam. Mă đơ̆ng yă măk thoi noh mă lei krao kŭm ưh đei chuơh vă răt. Chuơh ưh đei ‘nŏh mă đei hê̆ pơsei, tơmo, xi măng… kŭm tĕch ưh gơ̆h ‘năi, yoa ưh đei tơmam vă man. Nhôn bơngai tĕch mơdro nhen kơ ‘mŏn dơ̆ng 1 ƀôt, ưh băt vă pơpơ̆, pơpĕnh thoi yơ.”

Găh tơdrong ‘nâu, 1 ‘nu kơdră Anih vei lăng choh jang xa păng cham char Đắk Lắk ăn tơbăt, tơdrong tơm pơm ăn yă chuơh tŏk ‘nŏh yoa đak tơ̆ đak krong hrŏ, lơ thŏng nan kơmăy ưh gơ̆h năm hyup iŏk chuơh thoi năr hmă. Găh noh dơ̆ng, lơ thŏng nan hyup chuơh đĭ khei ‘năr asong jang bơih, oei gô pơm hla ar vă jang hơlơ̆k dơ̆ng kiơ̆ tơdrong hơgăt đơ̆ng luơ̆t.

Vă hơmet pơ 'lơ̆ng, Anih vei lăng athei dôm anih jang đei tôm hla ar jang hơtŏk tơdrong hyup chuơh, bơ̆ jang mă trŏ hăm tơdrong hơgăt vă pơm lăp hăm tơdrong 'mĕh vă tơ̆ anih ming man. Mă lei, tơdrong đak krong hrŏ tôch pơmat vă hyup chuơh sơnăm yơ kŭm đei tơ̆ Đắk Lắk; lơ thŏng nan kơmăy hyŭp chuơh kŭm ưh đei pơm hla ar bơ̆ jang hrơ̆ch 1 vât kơna tơdrong ưh kơmăh chuơh jing pơm ăn yă chuơh tŏk lơ tơ̆ Đắk Lắk, 'ngoăih kơ 'nŏh rŏ năng đei 1,2 tơdrong nai ‘năi.

Trung tá Nguyễn Đức Duy – Phŏ Kơdră Anih Kanh sat vei lăng mŭk drăm, Công an dêh char Đắk Lắk ăn tơbăt, ‘năr 5/5, Anih tơm vei lăng Công an đei hla ar chih pơtho ăn công an dôm dêh char hơlen năng rim tơdrong jang sir kôch, hyup iŏk, chơ chuĕn păng tĕch mơdro chuơh đơ̆ng đak krong vă pơyoa ăn tơdrong ming man. Anih Kanh sat vei lăng mŭk drăm oei jang hơdoi hăm Kanh sat vei lăng trong nơnăm păng Công an dôm tơring pơgơ̆r dăr joang, hơlen năng tơ̆ đĭ đăng 21 anih tĕch chuơh lơ̆m dêh char.

Mă lei, tơdrong tơm đơ̆ng chă dăr hơlen ‘nŏh vă vei sơđơ̆ng ăn tơdrong hyup iok chuơh, chơ chuĕn păng tĕch tơmam ming man. Tơpôl akhan, tơdrong dăr hơlen đơ̆ng công an pơm ăn anih hyup chuơh athei pơdơ̆h jang ‘mơ̆i, jing pơm tơlĕch tơdrong ưh kơmăh chuơh păng yă chuơh tŏk ‘nŏh ưh kơ trŏ ôh:  

“Tơdrong dăr lăng ‘măng mă âu vă vei lăng sơđơ̆ng ‘lơ̆ng ăn tơdrong kôch iŏk, tĕch mơdro chuơh. Anih jang oei gơ̆h hyup, kôch iŏk chuơh, tĕch mơdro hmă nhen tơdrong hơgăt đơ̆ng khôi luơ̆t. Tơdăh lơ̆m jơnăr dăr hơlen, nhôn ƀôh anih jang dăh mă khul grŭp, bơngai yơ pơm glăi ‘măn ôn tơmam, tơroi akhan tơmam ưh kơmăh vă hơtŏk yă, pơm glăi luơ̆t ‘nŏh nhôn gô sek tơlang tơpăt hloi, veh ver tơdrong pơm tơhli ưh kơmăh chuơh vă ming man.”

Tơdrong ưh kơmăh chuơh vă ming man tŏk bŏk ƀơm ưh ‘lơ̆ng truh tơdrong ming man tơ̆ lơ anih jang lơ̆m dêh char Đắk Lắk, tŭn anih jang păng kon pơlei huŏng lơ̆m tơdrong pơmat tat. Yă chuơh tŏk ưh lăp ƀơm ưh ‘lơ̆ng truh jên vă ming man đĕch, mă oei pơm pơmat truh tơdrong ming man, pơm ăn lơ anih tĕch mơdro tơmam ming man huŏng lơ̆m tơdrong pơmat tat. Mă đơ̆ng anih jang kơpal hlôi mât bơ̆ jang vă vei sơđơ̆ng tơdrong sir kôch, hyup iŏk, chơ chuĕn, tĕch mơdro chuơh bơih ră, mă lei mă tơpă oei kăl đei trong jang ‘lơ̆ng, đunh đai vă vei lăng măh mai chuơh, veh ver tơdrong ưh kơmăh chuơh đei hơlơ̆k dơ̆ng. Ƀât mă tơdrong ‘mĕh vă ming man roi tŏk, tơdrong vei lăng anih tĕch mơdro tơmam ming man rơđăh ‘lơ̆ng, đei yoa ‘nŏh jĭ tơdrong tôch gĭt kăl, vă vei lăng ‘lơ̆ng tơdrong đei yoa ăn teh đak, ăn anih tĕch mơdro păng kon pơlei.