Kiơ̆ tơdrong chă hơlen đơ̆ng rim bơngai khoa hŏk, hơgơ̆p C3, C4 hăp đei đơ̆ng ŭnh bluh kơ kông ŭnh Chư B'luk đunh kơ ou dang 600.000 sơnăm. Hơgơ̆p C3, C4 tơƀưh dih băl hăm jrŭ vă jê̆ 1000m. Ƀar hơgơ̆p ou jing hơgơ̆p kông ŭnh njrŭ hloh Đông Nam Á hăm hơgơ̆p tôch ‘lơ̆ng hơ iă.

Hơdrol kơ ‘noh, dêh char Dak Nông hlôi pơgơ̆r Pơm lêh sơng iŏk Hla bơar tơchơ̆t jing Hơnih gru gra gĭt kăl dăr sơnăm teh đak Hơgơ̆p C6-1, găh lơ̆m hơgơ̆p kông ŭnh tơ̆ Krông Nô. Hơgơ̆p C6-1 đei hơlen jĭ mŭk drăm gĭt kăl, kăl hloh tơ̆ Việt Nam păng Đông Nam Á. ‘Nou ưh khan lăp mŭk drăm groi teh mă oei jing hơnih sir tơchă mŭk drăm kră sơ̆, hơnih đei ƀôh kơting kră sơ̆ đei hơrih đunh kơ ou 6.000 sơnăm.

Hloh đơ̆ng sir tơchă lơ̆m hơgơ̆p C6-1 păng C6, rim bơngai sir tơchă hlôi tơchă ƀôh lơ tơmam drăm ‘noh rim tơmam pơ yoa ăn choh jang sa hăm tơmo păng gŏ ge, kơting sem bri, kơđoh kơđĕ, ƀrăng, hơbou, ƀôh gru gra kơ kong tơnuh. Mă kăl tơdrong tơchă ƀôh 3 hơnih pơsat, gru kơting 10 ‘nu bơngai kră sơ̆. Tơdrong ‘măng mă blŭng tơchă ƀôh kơting kră sơ̆ lơ̆m rim hơgơ̆p kông ŭnh jĭ tơdrong jang gĭt kăl hloh lơ hơnih tơchă mŭk drăm sơ̆ ki.

Lơ̆m sơnăm ou, apŭng Cư Jút (Đắk Nông) pơgơ̆r pơm lêh sơng iŏk Hla bơar tơchơ̆t hơnih gru gra gĭt kăl dăr sơnăm dêh char hăm Hơnih gru gra tơmang pơhiơ̆ ‘lơ̆ng liĕm Kông ŭnh Băng Mo, koeng kơphô̆ 4, thĭ trấn Ea T’ling. Kiơ̆ chă tơchĕng hơlen đơ̆ng rim bơngai khoa hŏk, lơ̆m bri Cham să groi teh plei teh UNESCO Đắk Nông đei tŏ sĕt hloh 5 sơlŭng ŭnh bluh, ‘noh đei: Kông ŭnh Nâm B’Lang, kông ŭnh Nâm Ka, kông ŭnh Nâm Gle (apŭng Krông Nô), kông ŭnh Nâm Dơng păng Kông ŭnh Băng Mo (apŭng Cư Jút).

Kông ŭnh Băng Mo tôch ‘lơ̆ng liĕm. Kông đei rup môk klŭng tŏk bŏk, jih sơlŭng rup oval (sơlŭng pengpong), ƀơ̆r sơlung tơ̆ kơpơ̆ng tih hơla iĕ păng đei thoong pơchoh tơbăt hơdăh ăn hơnih tơm ŭnh bluh. Hơgăt teh vat vei lăng hơnih gru gra să dang 13 ha.

Tơdrong lơ hơnih đei drơ̆ng jing hơnih gru gra gĭt kăl dăr sơnăm teh đak, hơnih gru gra gĭt kăl dăr sơnăm dêh char ‘noh jing tơdrong kăl hloh tơgop lơ̆m vei lăng năng tông kơjăp groi teh gĭt kăl kơ Cham să groi teh plei teh UNESCO Đắk Nông. Đơ̆ng noh atŏk kơtang hơvơn đei lơ đe tơmơ̆t jên jang lơ̆m iung jang kơjăp hơnih cham char ‘lơ̆ng rŏ, tơ iung pơjing jing hơnih tơmang pơhiơ̆, tơgop lơ̆m atŏk tơ iung mŭk drăm-tơpôl, pơm hơtŏk tơdrong hơrih sa sơđơ̆ng ăn kon pơlei.