Lơ̆m tơdrong chơt hơ-iă kơ tơdra hơri kơ kon pơlei Lào, kon pơlei păng tơmoi đei mơ̆ng păng hơsuang kiơ̆ tơdra chĭng chêng, tôn T’rưng, hlôm khen păng tơdra hơsuang Lăm vông guăng 'lơ̆ng, hrŭk hơbăn ao tanh đei hơnăn Um rŭp 'lơ̆ng tơring groi kông. Dôm ƀai hơsuang nhen "Hoa đẹp Chăm pa", "Sao Ken Fai", "Sa La Vắn", "I Kơng Đươn Đao"… hơvơn lơ tơmoi atŭm chă akŏm hăm đe tơdăm, đe hơdruh Lào.

Atŭm hăm noh đei akŏm săi đak kăp gĭt pơtih ăn pơyan phang, apinh đak 'mi jur pơm rơngơp cham char chêk lar. 'Nou adoi jĭ minh khôi kăp gĭt tơbang tơdrong hơpơi 'meh thơ thou 'lơ̆ng hơ-iă dih băl kơ bơngai Lào, hơpơi 'meh rim bơngai gô ôp rơgoh dôm tơdrong ưh kơ pŭn ai păng sơng dôm tơdrong 'lơ̆ng, jơnap lơ̆m sơnăm 'nao.