Năr pơchơt đei pơgơ̆r 2 năr ‘nŏh ‘năr 12 păng 13/4, hăm tơdrong vang akŏm đơ̆ng hlŏh 800 ‘nu ngê̆ nhơ̆n, kon pơlei găh dôm hơdrech kon kông truh đơ̆ng 17 apŭng, thĭ xăh, plt lơ̆m dêh char Gia Lai. Hăm hơnăn “Jơva bri kông”, pơih blŭng tơƀôh dơ̆ng um rup tơpôl rim hơdrĕch hơdrung vang akŏm tơ̆ “Pơlei hơdai” – anih akŏm rim tơdrong juăt ‘lơ̆ng, tơguăt đon lui, vang năm truh đon pơhnŏng pơjing Gia Lai pơdrŏng ‘lơ̆ng rŏ, mât 1 ƀơ̆r đon păng jang tŏk pran kơjăp. Đơ̆ng rŏng kơ ‘nŏh jĭ tơdrong tôn chĭng, hơxoang tơƀôh hơdăh tơdrong juăt, jŏh ayŏ kơ dŏ xoang đơ̆ng kon pơlei, đon hơpơi ‘mĕh jang tŏk đơ̆ng rim kon pơlei kon kông.

Đơ̆ng rŏng kơ gơmăng pơih blŭng, lơ khul ngê̆ nhơ̆n, vang tôn reh, hơri hơxoang, pơgơ̆r dơ̆ng dôm tơdrong et soi thoi kră sơ̆ nhen: Soi Ming yang klang đak, Kŏh xa kơpô, Sơmăh Kơcham, tôn chĭng, reh tĭng ning, teh chĭng klơk, chrăh mul, tang hơkăt, tanh brai vai khăn...

Yă Lê Thị Thanh Thủy-Kơdră Anih jŏh ayŏ kơ dŏ xoang, tơroi tơbăt păng tơplŏng kơdâu apŭng Mang Yang, dêh char Gia Lai, ăn tơbăt: “Mang Yang hơnhăk ăn năr âu dôm tơdrong ‘lơ̆ng hơiă hlŏh. Găh noh dơ̆ng, inh hơpơi ‘mĕh năr jŏh ayŏ âu đei pơgơ̆r hơnơ̆ng vă chĕp vei kơjăp dôm tơdrong juăt ‘lơ̆ng đơ̆ng hơdrech bơngai Bahnar păng dôm hơdrĕch kon kông nai tơ̆ tơring”.

Sơnăm ‘nâu, Khul ngê̆ nhơ̆n thĭ xăh Ayun Pa đei 46 ‘nu bơngai, vang tôn chĭng, tanh brai, truh hăm dôm tơdrong ngôi pơchơt kră sơ̆... Ngê̆ nhơ̆n Nay Ka tơ̆ Bon Phu Ama Nhuer 2, xăh Ia Rtô thĭ xăh Ayun Pa, tơroi: “Khul ngê̆ nhơ̆n thĭ xăh Ayun Pa nhôn vă pơgơ̆r dơ̆ng tơdrong Ƀrư̆ yang đang pơsat – 1 tơdrong juăt tôch hơiă đơ̆ng bơngai Jarai. ‘Nâu jĭ tơdrong et xa tih, soi, hŭt hơchăng hăm bơngai lôch đơ̆ng bơngai Jarai Cheo Reo. Tơdrong pơgơ̆r dơ̆ng Ƀrư̆ng yang đang pơsat vă tơƀôh hơdăh tơdrong juăt  tôch ‘lơ̆ng đơ̆ng kon pơlei Jarai, tơtă ăn rim jơhnơr mơlôh athei băt păng năng kăl dôm tơdrong juăt đơ̆ng chăl yă ƀok sơ̆.”

Ngê̆ nhơ̆n Siu Thưm – tơ̆ Plei Ku Roh, plt Pleiku, ăn tơbăt, khul plei sư đei 40 ‘nu ngê̆ nhơ̆n, vă tôn lơ ƀai tôch hơiă, kŭm hăm lơ lơboa hơri brông so. ‘Nâu jĭ jơnăr vă roi tơƀôh ăn tơmoi dôm kơjă kăp gĭt đơ̆ng jŏh ayŏ kơ dŏ xoang gĭt kăl đơ̆ng hơdrĕch hơdrung kơdih: “‘Măng mă âu ưh đei vă pơjei hăm dôm khul nai, mă jơnăr âu vă tơƀâp, hŏk iŏk đơ̆ng băl. Yoa thoi noh, nhôn ‘mĕh hơnhăk ba lơ tơdrong juăt ‘lơ̆ng hơiă hlŏh đơ̆ng bơngai Jarai tơ̆ Pleiku vă roi tơƀôh ăn rim khul bôl boăl păng tơmoi chă tơmang lăng truh hăm Gia Lai. Yoa thoi noh đĭ đăng ngê̆ nhơ̆n tôch hơiă păng adrin tôch ai”.

Anih pơgơ̆r năr pơchơt đei ƀĕnh tơdrong juăt, jŏh ayŏ kơ dŏ xoang ‘lơ̆ng hơiă, tơƀôh dơ̆ng tơdrong arih xa đơ̆ng rim tơpôl, hrŭk pơrŏ hơbăn ao tanh đơ̆ng rim hơdrĕch, tôn chĭng, hơxoang, pai tơmam xa păng pơgơ̆r pơm ngôi lơ tơdrong pơchơt thoi kră sơ̆; ming pơdă lơ tơmam ‘lơ̆ng tơ̆ tơring nhen chĕh phe, tơdrô ge, pơlăh đing, ‘nhĕm ƀuh… tơgop roi tơƀôh tơdrong juăt ‘lơ̆ng đơ̆ng sơ̆ kŭm hăm lơ tơdrong juăt ‘lơ̆ng hơiă đơ̆ng kon pơlei dôm hơdrĕch kon kông lơ̆m dêh char./.