Sơnăm 2024, Tơdrong jang đĭ đăng kon pơlei tơgoăt pôm nơ̆r ƀơ̆r đon pơjing tơdrong hơrih sa ‘lơ̆ng hơiă hlôi đei tơlĕch jang đei yua đơ̆ng trung ương truh tơring tơklep hăm dôm tơdrong hơgăt, hơnăp jang hơtŏk tơiung mŭk drăm, tơpôl, hơnơ̆ng păr ang pran kơtang lơ̆m tơdrong hơrih sa. ‘Moi kiơ̆  rim tơdrong bơ̆jang đơ̆ng tơdrong jang, kon pơlei păng rim khŭl jang hlôi hơtŏk tơdrong joăt joe ‘mêm tơgŭm dih băl, tŭn pran bơ̆jang “Băt bơnê”, năm ngôi, pơlung, tơƀôh jơhngơ̆m băt bơnê hăm bơngai đei kŏng hăm teh đak.

Pơma tơ̆ jơ hop akŏm, Phŏ Thủ tướng Lê Thành Long pơma hơdăh, tơdrong jang “ Đĭ đăng kon pơlei tơgoăt pôm nơ̆r ƀơ̆r đon pơjing tơdrong hơrih sa ‘lơ̆ng hơiă” hơnơ̆ng jing tơdrong tơm kơjăp ‘lơ̆ng lơ̆m rim tơdrong jang tơdrong hơrih sa tơpôl. Athei sơnăm 2025, rơih iŏk dôm tơdrong jang dăh mă băt hơdăh tơdrong ‘lơ̆ng vă tơlĕch jang mă lăp, lơ̆m noh gĭt kăl ‘noh jĭ lăng kăl truh tơdrong jang ưh kơ pơm pơhơi hăm dôm tơdrong pơm glăi ưh kơ trŏ hăm joh ayŏ, ƀơ̆t lăp pơm glăi khôi luơ̆t.