Lơ̆m jơ ‘năr pơgơ̆r kăl, 11 ‘nu kang ƀô̆ năm bơ̆ jang B păng ŭnh hnam kơ 22 ‘nu kang ƀô̆ anai hlôi sơng iŏk dơ̆ng dôm hô sơ đei mong răk ‘lơ̆ng liĕm prăt pơđăm jĭt sơnăm ou ki. Lăp đơ̆ng rŏng pơm lêh pơdreo hô  sơ, dêh char Gia Lai pơgơ̆r blŭng a pơdă “Atŏk tơ iung groi teh Bazan”, tơbăt dơ̆ng tơdrong jang iung tơblăh păng tơ iung pơjing đơ̆ng ƀô̆ đô̆i kon pơlei Gia Lai - đơ̆ng rŏng Tơdrong tơchơ̆t Giơ-ne-vơ sơnăm 1954 trugh klhei ‘năr teh đak rơngei hiôk hian, păng dôm hơyak tơplih kơtang lơ̆m atŏk tơ iung hrei ou. ‘Măng pơdă đei klăh asong 2 tơdrong ‘noh “Yak hloh pla ‘nhi tơblăh vang” păng “Atŏk tơ iung tŏk bŏk kơdrơ̆ng”, tơƀôh tơbăt kơhreng tai liu, rup gĭt kăl lơ̆m 50 sơnăm rơngei Gia Lai (17/3/1975) păng 50 sơnăm rơngei tơring Pơbăh (30/4/1975) Teh đak rơngei keh kong.