Đei 'măng năm truh tơmang tơ̆ Đăk Lăk lơ̆m dôm năr tơjê̆ pơgơ̆r Lêh akŏm kaphê Buôn Ma Thuột 'măng mă 9, pơmai Đoàn Thị Phương Tấm, tơ̆ pơlei tơm  Hải Phòng sô̆ lơ̆m jơhngơ̆m kơlih ƀôh tơdrong hơmet ăn lêh akŏm tŏk bŏk oei đei pơgơ̆r tơ̆ tơring: “Inh truh hăm Buôn Ma Thuột lơ̆m 'măng ou hrôih hloh kơ lêh akŏm minh giĕng. Tơ̆ dôm nha hang, anih dăng oei tơ̆ trong kơphô̆ ƀôh đei lơ banner tơbang gah lêh akŏm kaphê Buôn Ma Thuột. Đơ̆ng chă pơma dơnuh inh đei băt lêh akŏm đei pơgơ̆r 2 sơnăm minh 'măng păng pơgơ̆r tih. Ƀôh hơdah Đăk Lăk lơ̆m dôm sơnăm kơ ou tơrĕk tơnăp hloh gah tơdrong jang tơmang pơhiơ̆. Tôm anih truh tơmang lăng adoi đei tơdrong sơng drơ̆ng 'lơ̆ng hơƀăp hăm tơmoi”.

Sơnăm ou, Lêh akŏm kaphê Buôn Ma Thuột đei pơgơ̆r đơ̆ng năr 9 - 13/3 hăm lơ tơdrong kăp gĭt, 'lơ̆ng hơ-iă. Vă pơtrŏ hăm tơdrong kăl đơ̆ng kon pơlei păng tơmoi truh lăng, dang ei tơ̆ tôm anih oei xa, nha hang, khăch sạn tơ̆ Đăk Lăk adoi hơmet ming tơnăp, asong bơngai jang. Ƀok Nguyễn Minh Khánh, kơdră pơgơ̆r jang khăch sạn Elephans, pơlei tơm Buôn Ma Thuột ăn tơbăt: “Khăch sạn nhôn đei 185 lăm hăm 4 tăl lăm. Truh khei năr ou tôm lăm oei kơ khăch sạn hlôi chih măt tôm, lơ hloh noh ah năr 9 – 11/3. Tơmoi adoi pơkăp bơih, đei minh ƀar tơmoi pơkăp đơ̆ng hrôih. Păng vă hơmet ăn lêh akŏm kaphê truh ou kơnh noh khăch sạn adoi pơm kiơ̆ pơkăp kơtol băng rôn, hla bar tơbang dôm tơdrong jang kơ lêh akŏm”.

Jơ̆p dêh char Đăk Lăk dang ei đei jê̆ 280 anih dăng oei kơchăng sơng tơmoi hăm kơsô̆ jê̆ 5.600 lăm, 12.400 giơng. Lơ̆m noh đei 21 khăch sạn đơ̆ng 1 - 5 sao, oei dôm to noh anih pơdơh pơdei, homestay, anih kăm trăi păng hnam oei tơmang pơhiơ̆. Truh dang ei, tơ̆ dôm anih ou hlôi đei đơ̆ng 35-98%, minh ƀar anih hlôi tơbang đĭ lăm oei bơih.

'Nhŏng Võ Minh, Kơdră vei lăng 2 anih oei pơdơh pơdei tơ̆ Buôn Ma Thuột tơroi, anih jang hlôi hơmet bơngai jang, hơtŏk kơsô̆ bơngai jang kiơ̆ pơyan hlôi đei pơhrăm vă 'măn jong păng tơroi tơbăt ăn tơmoi. Atŭm hăm noh, lơ tơdrong asong vă hơtŏk tơdrong tơmang pơhiơ̆ adoi đei tơlĕch, vă hơvơn lơ tơmoi truh lơ̆m dôm năr akŏm lêh: “Chih akŏm tơbang dôm tơmam xa kăp gĭt Tây Nguyên, bơ̆ dôm tơdrong tơbang gah tơmang pơhiơ̆, dôm tơdrong tơgŭm păng asong tơmam'nhăk vih ăn tơmoi truh oei hŏk hơlen lơ̆m 'măng akŏm ou. Tôm khăch sạn păng resort ưh đei hơtŏk kơjă mă oei tơjur kơjă trŏ ƀlep ăn dôm kŏng ti jang tơmang pơhiơ̆ vă hơvơn hơtŏk pơm jang tơmang pơhiơ̆ ăn Đăk Lăk dang ei”.

Atŭm hăm hơmet dôm tơdrong kăl gah anih oei pơdơh pơdei, rim anih jang gah tơmang pơhiơ̆ adoi kơchăng chă hơlen akŏm dôm tơdrong tơmang tour, vă hơvơn lơ tơmoi truh, tơguăt atŭm hăm dôm tơdrong jang lơ̆m lêh akŏm kaphê.

Đei 34 tour tơmang pơhiơ̆ đei pơjing hăm lơ tơdrong hơlen băt vă tơmoi chă rơih, lơ̆m noh đei lơ tour tơguăt hăm tơdrong tơmang lăng mŭk drăm joh ayŏ kră sơ̆, chă tơroi tơbăt kơ dôm anih 'lơ̆ng rŏ păng dôm anih gru gra kăp gĭt tơ̆ Đăk Lăk. Kiơ̆ kơ ƀok Lê Văn Đức, Phŏ kơdră Jơnŭm jang tơmang pơhiơ̆ Đăk Lăk, băt hơdah đơ̆ng dôm 'măng lêh akŏm hơdrol ki, rim anih jang tơmang pơhiơ̆ hlôi rơih hơdah dôm anih truh tơmang, hơlen băt păng hơmet jơ năr mă trŏ ƀlep vă tơmoi ƀônh hiôk chă rơih dôm tour tơmang mă trŏ ƀlep: “Nhen tôm anih jang mŭk drăm jang tơmang pơhiơ̆ adoi kơchăng păng hơmet tơnăp tôm tour tơmang pơhiơ̆, mă trŏ ƀlep păng tơnăp hloh. Mă kăl tơguăt hăm dôm anih gru gra păng dôm anih 'lơ̆ng rŏ kơ dêh char Đăk Lăk, pơjing đei tơdrong juăt jang kaphê vă tơmoi truh tơmang hơlen băt gah tơdrong jang kaphê. Păng khei 3 ou noh pơyan pơkao kaphê chôh lơ, noh tơmoi truh tơ̆ ou ƀônh đei jơ chă tơmang lăng păng hrou dơh po hăm pơyan lêh akŏm”.

Jĭ tơdrong kăp gĭt hăm lơ tơdrong jang 'lơ̆ng, Lêh akŏm kaphê Buôn Ma Thuột đei lăng jĭ trong hiôk vă tơbang mŭk drăm kơ Đăk Lăk, hơvơn asong jang, hơtŏk mŭk drăm. Vă pơjing đei um ai 'lơ̆ng rŏ lơ̆m đon bơnôh tơmoi, anih jang tơmang pơhiơ̆ Đăk Lăk tŏk bŏk hơmet dôm tơdrong tơnăp hloh, kơchăng jong ăn tơmoi truh tơmang lơ̆m lêh akŏm 'măng mă 9 ou.