VOV4.Bahnar – Năr akŏm Joh ayŏ kon pơlei kon kông dêh char Gia Lai 'măng mă 4 pơgơ̆r đơ̆ng năr 11 truh năr 13/4/2025, lơ̆m pơkăp dôm tơdrong jang sơng kơ kuh 50 sơnăm Năr Tơblah jơnei tơring pơbah, rơngei teh đak.

VOV4.Bahnar – Năr 8/4, Anih Pơdah tơmam drăm đơ̆ng tơdrong Tơblah Hồ Chí Minh pơtơm pơdah hơnăn "50 sơnăm păr ang ling lang tơdrong hơri nuih mơng", pơdah đei jê̆ 500 tŏ um, tomam drăm bơ̆ng pang kăp gĭt.

VOV4.Bahnar – Tơmang pơhiơ̆ Đăk Lăk hlôi tŏk jê̆ tong hơnê̆ gah kơsô̆ tơmoi păng tơdrong pơyua lơ̆m jăl 1 sơnăm ou.

VOV4.Bahnar – Pơgê 'năr brei (7/4), tơ̆ Anih tơmang pơhiơ̆ chơkơi Prenn Đà Lạt, dêh char Lâm Đồng hlôi pơgơ̆r Lêh akŏm yôk Ƀok dơnơm Hùng Vương.

VOV4.Bahnar - Tơ̆ apŭng sơlam Tuy Đức, dêh char Đắk Nông, dang ei đei hloh 200 ŭnh hnam hăm vă jê̆ 1.200 ‘nu pơlei dêh char Phú Thọ hơrih sa. Vă vei răk tơdrong lui kơyang păng hơtŏk tơdrong joăt joe “nhă đak ƀlŏk kơtu”, kon pơlei vang tơra jên, năr jang pơm hnam soi ƀok Pơtao Hùng. ‘Nâu ưh khan lăp jing tơdrong hơdrin vei răk joh ayŏ so mă oei jing trong vă chĕp răk păng tơƀăk mong tơdrong joăt joe vei lăng Teh đak, tơgop hơmet ming grŭp tơgoăt pôm nơ̆r ƀơ̆r đon đĭ đăng hơdrĕch hơdrŭng tơ̆ tơring sơlam Tây Nguyên.

VOV4.Bahnar - Năr Yôk ƀok dơnơm Hùng, kon pơlei rim hơdrung Tây Nguyên vang lăng truh tơm a la chă hơdrĕch hơdrung, tơbăt jơhngơ̆m đon hôn bơnê hăm rim mĕ ƀă ya ƀok hlôi tơ iung pơjing teh đak. Mă đơ̆ng oei tơ̆ yơ, kon pơlei Tây Nguyên ling lang chĕp kơjăp nơ̆r pơtho đơ̆ng Ƀok Hô: “Rim Ƀok pơtao Hùng hlôi pơjing teh đak, ƀok sou bơ̆n hơdrin vei kơjăp teh đak”, pơm ăn jơhngơ̆m đon hưch hanh hơdrĕch hơdrung jing jơhngơm pran tơ iung pơjing pơlei pơla roi năr roi pơdrŏng ‘lơ̆ng liĕm.

VOV4.Bahnar – Lơ̆m mŭk drăm joh ayŏ kơ kon pơlei kon kông tơ̆ Tây Nguyên, chrah mul meo đei lăng jĭ tơdrong joh ayŏ kăp gĭt hloh. Mul meo pơsat kơ kon pơlei Bahnar tơ̆ Tây Nguyên ưh hơdrô̆ jĭ dôm tơmam drăm chrah ƀônh ƀŏ ôh, mă kiơ̆ đơ̆ng noh oei tơƀôh hơdah đon lui kơ tơdrong hơrih.

VOV4.Bahnar – Bơngai Êđê hơrih tơguăt hăm cham char plenh teh, đe sư lăng bri kông 'noh hnam, tơm dơnơm kơ tơdrong hơrih. Đe sư băt chă iŏk yua dôm tơmam drăm mă bri kông pơsư̆ ăn vă pơjing 'nhot xa ưh hơdrô̆ 'lơ̆ng mă akŏm ƀenh kơ tơdrong joh ayŏ hơdrung hơdrĕch kon pơlei kơdih. Hla tơnŭng, minh hơdrĕch 'long chăt hon tơ̆ jih đak, tơ̆ mir, hăp ƀăl iơ iă, jĭ minh lơ̆m dôm hla 'nhot kăp gĭt đei bơngai Êđê iŏk pơjing 'nhot tŭl ka hơ̆p.

VOV4.Bahnar - Mă đơ̆ng tơring Teh tơmăn đak krong Cửu Long đei lơ đak krong, hơbong đak, đei lơ kông lôk mă lei tơdrong tơtăm đơ̆ng Đảng- Teh đak hlôi tơlĕch lơ jên pơm trong truh dang ei um ai tơ̆ tơring âu đei tơplih tôch hơiă. Gơng, trong đei man kơjăp ‘lơ̆ng, trong yak hiôk hian, tơjur ƀiơ̆ jơnăr yak vih vât, chơ chuĕn tơmam ‘nŏh jĭ tơdrong ‘lơ̆ng vă tơring teh đei 9 tŏ đak krong âu jang tŏk, hơđơ̆ng jơhngâm mât lơ̆m chăl ‘nao.

VOV4.Bahnar - Ƀok Khamtay Siphandone, sơ̆ jang Kơdră Ƀan châ̆p hanh Trung ương Đảng Kon pơlei Kăch mang Lào, sơ̆ jang Kơdră teh đak, jang Thủ tướng teh đak Cộng hòa Dân chủ Nhân dân Lào lôch hơchăng. Vă tơƀôh đon bơnôh băt 'mêm kơ ƀok Khamtay Siphandone păng đei đơ̆ng tơdrong jang tơbôl kăp gĭt Việt Nam - Lào, Đảng, Teh đak Việt Nam hlôi tơchơ̆t akŏm Kơ-ŭ pơdoong ƀok Khamtay Siphandone kiơ̆ khôi pơkăp kơ-ŭ pơdoong lơ̆m jơ̆p Teh đak lơ̆m 2 năr noh năr 4 păng 5/4/2025. Tơdrong tơbôl kơjăp đơ̆ng Việt Nam păng Lào đei dôm chăl Kơdră pơgơ̆r kơ 2 Đảng, 2 Jưnŭm pơgơ̆r păng kon pơlei 2 teh đak akŏm jơhngơ̆m hơtŏk. Găn ga hloh 60 sơnăm jô̆ đơ̆ng iung jang tơbôl truh dang ei, tơdrong jang tơbôl kăp gĭt ou roi năr roi kơhret kơjă păng jang đei jơnei hloh.