Ƀlep lơ̆m năr tơbăt 136 sơnăm Năr rơneh Ƀok Hô, Khul chih tơdrong tơroi hle joh ayŏ dêh char Dak Lăk iung jang hơdoi hăm Trung đoàn Cảnh sát cơ động Tây Nguyên păng Hnam trương Đại học Luật Hà Nội tơ̆ Dak Lăk pơgơ̆r pơma dơnuh “Dôm kơsơ̆p hla bơar chih găh Ƀok Hô păng jơhngơ̆m đon hơpơi ‘meh vă khul mơlôh”. ‘Măng pơgơ̆r hơvơn đei lơ bơngai joh hơri, ƀok thây kô pơtho, kang ƀô̆ kŏng ang păng sinh viên vang năm. Dôm nơ̆r tơgop tơ̆ pơma dơnuh sơkơ̆t hơdăh, lơ̆m chăl kơsô̆, tơdrong đŏk kơsơ̆p hla bơar găh Ƀok Hô ưh khan lăp tơgŭm ăn jơhnơr mơlôh băt hlôh ƀôh nhên găh chăl sơnăm kơ hơdrĕch hơdrung mă oei tơgop lơ̆m pơm hơtŏk jơhngơ̆m đon ‘lơ̆ng, tơdrong hơrih sa hơ iă lăng ba truh pơlei pơla. Kiơ̆ đơ̆ng Bơngai chih tơdrong tơroi hle Niê Thanh Mai, Kơdră chĕp pơgơ̆r Khul Chih tơdrong tơroi hle Joh ayŏ dêh char Dak Lăk, khei năr kơnh gô hơnơ̆ng lang să rim ƀai chih găh Ƀok Hô hăm lơ trong vă hơnhăk tơdrong kăp gĭt kơ jơhngơ̆m đon ‘lơ̆ng, trong jang gơh hơgei kơ Ƀok Hô truh tơjê̆ hloh dơ̆ng hăm tơpôl kon pơlei pơla.