Hăm hơgăt teh hloh 35.700 hec-tar, lơ̆m noh hloh 90% teh choh jang xa, apŭng Krông Búk, dêh char Đăk Lăk lăng anih hiôk dơnơm kơ po noh hơtŏk pơtăm dôm hơdrĕch 'long kŏng ngĭp. Ƀok Nguyễn Hải Đông, Ƀĭ thư huyên uy Krông Búk ăn tơbăt, apŭng tŏk bŏk oei akŏm chih akŏm pơkăp iŏk yua teh truh sơnăm 2030, vă vei sơđơ̆ng tơdrong asong teh mă trŏ hăm rim kơluăi teh 'măn pơm jang hơtŏk mŭk drăm tơpôl: “Tơring tŏk bŏk oei thuê rim bơngai juăt jang tơgŭm chih akŏm dôm tơdrong vă vei sơđơ̆ng tơdrong pơkăp hơtŭm đơ̆ng dêh char, đơ̆ng trung ương. Ah jang keh đang tơdrong jang ou noh hơvơn asong jang adoi nhen pơjing ming man anih jang, tĕch teh, asong teh ăn kon pơlei gơh đei sơđơ̆ng. Mưh jang đei jơnei tơdrong mă ou noh tơchơ̆t gah hơtŏk mŭk drăm tơpôl păng tơchơ̆t hloh 8% hơmŏ gô đei jơnei”.

Đei hơgăt teh să hloh 176.000 hec-tar, Ea Súp jĭ apŭng đei teh să hloh tơ̆ Đăk Lăk. Mă lei, ou jĭ minh lơ̆m dôm apŭng hin dơnuh hloh dêh char; minh pah kơ tơdrong kăp gĭt noh lê̆ huach ah đei dôm jĭt hectar teh oei tơhlăk lơ̆m dôm tơdrong pơkăp jang păng ƀơm kon pơlei tơgar iŏk. Vă hơmet pơ-'lơ̆ng tơdrong mă ou, apŭng tŏk bŏk oei pơm kiơ̆ pơkăp iŏk tơvih teh ƀơm tơgar vă akŏm pơjing teh 'lơ̆ng, hơvơn rim anih jang mŭk drăm pran truh asong pơm jang. Hăm dôm tơdrong hơdrin ou, apŭng Ea Súp hơmŏ ưh hơdrô̆ pơih trong hiôk ăn tơdrong hơtŏk choh jang xa mă oei tơrĕk hơvơn lơ tơdrong choh jang xa kiơ̆ trong 'nao, tơgop hơtŏk kơjă tơmam drăm pơtăm đei, hơtŏk iŏk yua hơtŏk tơdrong hơrih ăn kon pơlei. Ƀok Đỗ Xuân Dũng, Phŏ ƀĭ thư huyên uy Ea Súp sơkơ̆t hơdah: “Gơh chă tơchơ̆t gah teh vă hơtŏk choh jang xa, jang gah bri lơ̆m tơring teh kơ apŭng Ea Súp 'noh tih tên tơpă. Kơyuơ noh apŭng Ea Súp hăt hot hơvơn rim anih jang dah năm truh hăm Ea Súp iŏk vei lăng păng pơm jang tơ̆ dôm tơring teh mă nhôn gô vă iŏk tơvih vă vei lăng, asong pơm jang, hơtŏk choh jang xa, jang gah bri kiơ̆ tơchơ̆t đơ̆ng khôi luơ̆t teh đak”.

Sơkơ̆t hơdah sơnong kăp gĭt kơ mŭk drăm teh lơ̆m jăl trong pơm jang hơtŏk mŭk drăm – tơpôl kơ dêh char, lơ̆m năr pơm jang mă blŭng hăm Anih Choh jang xa păng Cham char dêh char Đăk Lăk đơ̆ng rŏng kơ pơm kiơ̆ pơkăp bot 'lơ̆ng anih jang (tơmơ̆t hơdai Anih Choh jang xa păng Hơtŏk tơring hăm Anih jang Mŭk drăm păng Cham char), ƀok Nguyễn Thiên Văn, Phŏ Kơdră Anih jang vei lăng kon pơlei dêh char ăn tơbăt: Dêh char tŏk bŏk pơm kiơ̆ lơ trong tơlĕch jang vă pơm jang đei jơnei dôm mŭk drăm ou. Lơ̆m noh tơdrong iŏk tơvih teh ƀơm tơgar athei jang tơnăp hloh, atŭm hăm noh chă hơlen, hơmet pơkăp iŏk yua teh đei pơgơ̆r jang drơ̆ng minh, vei sơđơ̆ng trŏ ƀlep hăm rim tơring păng tơchơ̆t hơtŏk tơ-iung hơtŭm kơ dêh char. Ƀok Nguyễn Thiên Văn pơtruh nơ̆r hăm Anih Choh jang xa păng Cham char dah akŏm jang kiơ̆ tơchơ̆t tơlĕch ou: “Hơtŏk tenh tơdrong akŏm iŏk tơvih hăm dôm anih teh ƀơm tơgar lơ̆m tơring teh kơ dêh char bơih, păng đơ̆ng rŏng kơ iŏk tơvih teh ƀơm tơgar noh athei tơgŭm ăn anih jang vei lăng kon pơlei dêh char tơroi hăm anih jang tĭnh uy gah trong iŏk yua teh đơ̆ng rŏng kơ iŏk tơvih, pơgơ̆r rim anih jang athei tenh kuăng pơm jang kiơ̆ pơkăp ou noh pơtơm jang drơ̆ng minh păng pơm jang tơnăp tơchơ̆t đơ̆ng dêh char, anih jang đảng adoi nhen tơdrong pơgơ̆r jang đơ̆ng trung ương”.

Vei lăng păng iŏk yua teh tơnăp ưh hơdrô̆ tơgŭm ăn Đăk Lăk jang đei jơnei tơchơ̆t hơtŏk mŭk drăm truh 8%, mă oei pơm trong kơjăp ăn hơtŏk tơ-iung kơjăp sơđơ̆ng. Hăm dôm trong tơlĕch jang trŏ ƀlep, đơ̆ng pơkăp teh, asong ming man anih jang, hơvơn anih jang mŭk drăm truh vei lăng cham char, Đăk Lăk gơh iŏk yua tơnăp hloh mŭk drăm teh, pơjing ou jĭ jơhngơ̆m pran kăp gĭt vă hơtŏk tơdrong hơrih ăn kon pơlei păng hơtŏk tơdrong jang mŭk drăm tơ̆ tơring roi năr roi hơtŏk tơ-iung.