Yă Ngô Thị Kim Xuyến, oei tơ̆ kueng kơphô̆ 1, thĭ trơ̆n Quảng Phú, apŭng Cư Mgar ăn tơbăt: “Inh sô̆ hơ-iă dêh, dôm năr kơ ou inh ưh gơh tep hloi. Inh bơnê kơ Đảng, Teh đak păng khul kŏng an man ăn kơ unh hnam inh gơh đei hnam oei, sô̆ sôn dêh”.

Oei pơmai H'En Niê oei tơ̆ pơlei Kmiên, xah Ea Drông, thĭ xah Buôn Hồ 'noh ƀrơ̆k kơ jơhngơ̆m tơroi lơ̆m năr pơtơm ming man hnam 'nao thoi ou: “Ƀrơ̆k kơ jơhngơ̆m tơpă, ưh kơ băt vă pơma kiơ hloi, kăp gĭt tơpă, đei hnam tơnŏ vă unh hnam đei anih dăng oei găn tŏ 'mi kial. Hơnô̆ hơnăp kơnh bre klo hơkăn nhi pơ-'nam pơm jang, hơdrin vă hơtŏk mŭk drăm”.

Rim bơbŭng hnam ou oei lơ̆m Tơdrong jang man 'nao 4.285 tŏ hnam asong ăn unh hnam hin dơnuh, tơjê̆ hin dơnuh lơ̆m dêh char Đăk Lăk (krao kơđeh noh Tơdrong jang 214) kơyuơ Kŏng an dêh char pơgơ̆r, pơm jang đơ̆ng blŭng khei 3 sơnăm ou. Kiơ̆ kơ 'noh, hăm kơsô̆ jên jê̆ 343 tih hlj, rim tŏ hnam man 'nao đei tơgŭm 80 triu hlj, lơ̆m noh 60 triu hlj iŏk jên tơgŭm đơ̆ng trung ương păng 20 triu hlj đơ̆ng jên mong kơ dêh char. Atŭm hăm noh, tơdrong jang adoi tơgŭm hơmet ming 1.120 tŏ hnam hăm jên tơgŭm 30 triu hlj ăn rim tŏ hnam.

Đơ̆ng rŏng tong hơnê̆ khei tơlĕch jang, hlôi đei 1.026 tŏ hnam lơ̆m Tơdrong jang 214 đei pơtơm ming man, kơchĕng keh đang lơ̆m khei 4 truh. Thiếu tướng Lê Vinh Quy, Kơdră Kŏng an dêh char Đăk Lăk ăn tơbăt, đơ̆ng rŏng kơ pơtôch tơdrong jang kŏng an tơ̆ apŭng, dêh char pơjao kŏng an xah, phương, thĭ trơ̆n kơtă iŏk jang hăm tơchơ̆t hơdrin keh đang ming man 4.285 tŏ hnam lơ̆m 5 khei minh puơ̆t: “Hơdrin keh đang trŏ nhen tơchơ̆t truh năr 15/8/2025. Nhôn hlôi pơtruh ăn đe kơdră kŏng an 180 xah, phương, thĭ trơ̆n vă đe sư pơtoi tơgŭm ăn jơnŭm pơgơ̆r tơring păng kơtă akŏm khul pơm jang tơ̆ tơring atŭm hăm khul pơm jang kơ jơnŭm pơgơ̆r tơring, hơdrin tơgŭm kon pơlei ming man trŏ khei năr tơchơ̆t păng 'lơ̆ng kơjăp”.

Atŭm hăm tơdrong jang 214 kơyuơ Kŏng an dêh char pơgơ̆r, tơ̆ dêh char Đăk Lăk đei 3 tơdrong jang nai tŏk bŏk đei pơm jang hăm tơchơ̆t man đei 3.027 tŏ hnam tơgŭm ăn unh hnam mă teh đak tơchơ̆t tơgŭm, bơngai đei kŏng, unh hnam hin dơnuh. Dôm tơdrong jang ou đei asong bơngai jang vih truh tơring vă tơlĕch jang. Ƀok Nguyễn Hải Đông, Ƀĭ thư Huyên uy Krông Búk ăn tơbăt, apŭng khŏm mă keh đang tơdrong man păng hơmet 141 tŏ hnam hơdrol kơ pơyan 'mi: “Nhôn hlôi tơlĕch tơchơ̆t keh đang tôm tơdrong man păng hơmet ming hnam hơdrol kơ năr 15/7 ou kơnh. Nhôn pơgơ̆r jang tơnăp hăm dôm anih iŏk jang, rim anih jang mŭk drăm adoi nhen dôm tơring akŏm pơm jang vă dah keh đang hơdrol kơ khei năr pơkăp pơtêng hăm dêh char păng minh ƀar tơring keh đang trŏ ah 'măng tơbăt Năr Kăch mang khei 8 đei jơnei keh kong”.

Hăm tơdrong kơ-'nôh, atŭm jơhngơ̆m đơ̆ng tôm anih jang chĭn trĭ tơ̆ Đăk Lăk, dôm bơbŭng hnam kơjăp 'lơ̆ng tŏk bŏk tenh kuăng đei pơtăl ăn hnam pơgia, hnam hyah hyok. Bơbŭng hnam 'nao gô pơjing jơhngơ̆m pran vă rim unh hnam găn hloh tơnap tap, hơtŏk đon lui hăm dôm tơchơ̆t jang đơ̆ng Đảng păng teh đak, hơdrin jang hơtŏk tơ-iung lơ̆m tơdrong hơrih.