Plei K’La xăh Đray Sáp kŭm hmă nhen dôm pơlei pơla Ê-Đê tơ̆ dêh char Đắk Lắk, hăm jăl trong tơring tơrang ‘nao păng dôm pơgar cheh phe tơ̆ dôm hnam kơ jung. Mơ̆t hlom lơ̆m plei K’La ‘noh jĭ tơdrong pha ra hăm 1 hnam kơmăy pơm tơlĕch cheh phe prăt năr ƀâu phu phơ phơ̆r. ‘Noh jĭ hnam kơmăy kơ kŏng ti Cổ phần Êđê Café.

Y Pôt Niê - bơngai pợing păng jing kơdră vei lăng kŏng ti kŭm tŏk bŏk tơ̆ âu. Sư ‘nao kơdâu kơmăy hơdrĕng, ot um rơih, hơdai hăm ti jang răh - ƀơ̆r pơma răh, pơcheh tơdrong jang iŏk yua kơmăy kơsô̆, păng tơroi găh anih jang iŏk yua kơmăy kơmŏk ‘nao vă pơm tơlĕch lơ kơloăi cheh phe ‘lơ̆ng.

Đơ̆ng rŏng 4 sơnăm iung jang, đơ̆ng 1 ‘nu ƀak si vih hơlơ̆k hăm tơdrong jang cheh phe, Y Pôt Niê hlôi yak hloh lơ mơmat tat găh tơdrong pơgăn nơ̆r pơma, găh ưh kơ măh hloi jên hu păng tơdrong hlôh vao. Sư tơroi, kơdih pŭn dêh ƀơ̆t iŏk đơ̆ng blŭng đĭ lăng tơdrong mơ̆t hơdai lăp đơ̆ng joh ayŏ păng tĕch mơdro. Tơmam “Cheh phe ‘nhui ŭnh” kŭm hăm tơdrong tơroi găh kong tơnuh ŭnh, gŏ glang, tơpăl tŭl păng tơpang ti hơbĕch hơbal đơ̆ng đe mĕ lơ̆m plei K’La ƀơ̆t pơm đei kơloăi cheh phe ‘nâu, hlôi tơgŭm sư tơchă ƀôh lơ tơmoi răt tơmam păng pơđĭ dôm bơngai vang jang hơdai:

“Ĭnh pŭn dêh ƀơ̆t ‘nao iung jang đei, kơtă hloi tơmam tơm blŭng a, hlôi hơnhăk dôm bơngai đei vang hưch hanh nhen ĭnh. Đe sư hlôi krao điên thoăi apĭnh đei vang jang hơdai. Đơ̆ng noh kơdih kâu Pốt hlôi hơmet đei bơngai jang lơ̆m kŏng ti. Bơngai ‘noh vei lăng tơring tơmam, bơngai ‘noh vei lăng tơdrong hơhrĕng ot. Oei kơdih Pốt ‘noh năm tơchă, năm pơtrŭt mơdro sa tơ̆ dôm dêh char, vang akŏm dôm jơnŭm kơchơ păng mă kăl hloh dơ̆ng ‘noh jĭ năm pơtrŭt tĕch mơdro tơ̆ teh đak đe”.

Tơdrong pơgăn găh nơ̆r pơma đei pơih hiôk hăm tơdrong hơdrin hŏk pơhrăm ưh kơ pơdơh, dang ei Y Pốt Niê đĭ lui ngeh lơ̆m dôm ‘măng năm tơ̆ Thái Lan, Nhật Bản, Đức, Canada.  Plei K’la kơ kot păng hơtăih anih kơdrơ̆m Buôn Ma Thuột, kŭm ưh kơ kĕ pơm mơmat đei Êđê Café, yua kơ tơmam đơ̆ng kŏng ti tŏk bŏk đei tĕch tơ̆ jơ̆p dôm hơnih tĕch mơdro điện tử. Kơtă hloi dôm bơngai kră tơ̆ plei K’La dang ei kŭm băt găh trong jang ‘nao tơ̆ Êđê Café, ƀôh đei tơdrong hơiă, tơdrong hơgei đơ̆ng khŭl mơlôh. Ƀok ƀă Băm, 64 sơnăm, pơ ư:

"Sư hơgei dêh, Cheh phe găr phĕ đum sư băt, phĕ kơ sĕ sư băt, phĕ ‘lơ̆p sư băt. Tơdăh cheh phe bơ̆n phĕ đum đĭ bơih ‘noh sư răt kơjă măk. Cheh phe phĕ kơ sĕ ‘noh kơ jă re, mă lei kŭm ưh kơ re nhen anih tĕch mơdro ôh. Tơdăh anih tĕch mơdro răt 135.000 ‘noh tơ̆ âu sư răt 136.000- 137. 000  hlak jên văi."

Yak hloh mơmat tat, iŏk yua đei tơplih ‘lơ̆ng rim sơnăm, Y Pot ƀôh hiôk chơt yua kơ dôm tơdrong hơdrin đơ̆ng kơdih hlôi hơnhăk ăn kơjă kơjăp ăn pơlei pơla.

Dôm năr hơtuch sơnăm 2024, Y Pốt Niê hlôi vang năm Hop akŏm bơngai jang tơroi tơbăt trực tuyến kơ Trung ương Đoàn găh “hlôh vao, bơ̆jang đơ̆ng hơdruh tơdăm găh chăl ‘nao păng tơdrong jang, hơnăp jang đơ̆ng jơhnơr mơlôh”, sư sa roi lui ngeh akhan dôm kơjă kăp gĭt mă sư druh kiơ̆ gô hơnhăk tơdrong jang cheh phe, hơnhăk pơlei pơla păng khŭl mơlôh truh hăm jơnei ‘nao:

“Kơdih kâu ĭnh Pốt ‘meh tơroi dơ̆ng tơdrong hơiă vă đe oh ‘lơ̆p păng dôm bơngai jang ‘nao găh đơ̆ng rŏng âu kơnh ‘noh jĭ trong jang cheh phe đơ̆ng ĭnh ‘noh vă ƀôh đei kơjă kăp gĭt đơ̆ng choh jang sa, kơjă kăp gĭt đơ̆ng pơlei pơla, vă kơ đe buăl mơlôh bơngai kon kông đei tơdrong tơplih đon tơchĕng, jang ‘lơ̆ng hloh, hơtŏk tơiung choh jang sa tơ̆ pơlei pơla roi ‘năr roi pran kơjăp hloh”.