Tơroi dơ̆ng jơhngơ̆m đon pơngơ̆t đơ̆ng kơdră dêh char Kon Tum lơ̆m khei 6 sơnăm 2020, ƀok Nguyễn Đức Tuy, Kơ iĕng Kơdră chĕp pơgơ̆r Đảng dêh char Kon Tum tơbăt, atŭm hăm trong tơlĕch jang trŏ ƀlep, găh kon bơngai ‘noh kăl hloh pơjing đei jơnei lơ̆m bơ̆ jang tơjur dơnuh. Hăm hơnăp jang Kơdră chĕp pơgơ̆r Khul bơ̆jang kơ Hơnih Đảng dêh char Kon Tum (krao vă kơđeh ‘noh khul 262), ƀok Nguyễn Đức Tuy, tơbăt, bơ̆jang chĕp pơgơ̆r, pơrô̆ jang đei tơlĕch jang tôch kơtang, dêh char pơjao hơdăh ăn kơdră chĕp pơgơ̆r rim hơnih bơ̆ jang dêh char păng apŭng, tơring, tơgŭm ăn kon pơlei Mường Hoong, Ngọk Linh hrôih yak hloh dơnuh hin.“Khul bơ̆ jang 262 hơnơ̆ng tơklep hăm tơring, hơnơ̆ng đei khul bơ̆ jang năm tơ̆ tơring, tơƀôh hơdăh hơnăp jang kơ khul chinh trĭ lơ̆m tơdrong tơgŭm kon pơlei atŏk tơ iung mŭk drăm tơpôl. Adoi, khul kang ƀô̆, đảng viên tơ̆ tơring, pơlei jei hlôi băt hlôh ƀôh hơdăh,đe sư hlôi vang iung jang kơtang vă atum hăm kon pơlei pơm lơ liơ 2 tơring ou hlôih yak hloh dơnuh hin”.

Tơlĕch jang kiơ̆ nơ̆r pơrô̆ jang đơ̆ng Hơnih Đảng dêh char Kon Tum, rim hơnih bơ̆ jang, rim khul jang Đảng, kơdră chĕp pơgơ̆r hlôi tơlĕch iung jang kơtang vă đei trong jang tơgŭm ăn jơnei hăm 2 tơring dơnuh hoh dêh char. Ƀok Huỳnh Mười, Kơ iĕng Kơdră chĕp pơgơ̆r Hơnih Pơprŏ tơdrong jang păng Tơmơ̆t jên jang dêh char Kon Tum tơbăt, hăm kon jên jang 3 Tơdrong jang tơm teh đak (vă jê̆ 100 ti hlak jên jăl jang 2021-2025), lơ̆m klăh asong kon jên jang ‘măn găh lơ vă pơjing rơvơn ăn 2 tơring atŏk tơ iung. Jăl trong glung tơƀưh đơ̆ng hơnih kơdrơ̆m apŭng Đak Glei năm tơ̆ Mường Hong, Ngọk Linh hăm apŭng Tu Mrông hơtăih 100km hlôi ming man keh đang, tơgŭm ăn trong chă yơ yak, chơ tơmam drăm hiôk hian hloh.

Ƀok Huỳnh Mười tơbăt, dêh char tŏk bŏk tơ iung pơjing, krao hơvơn tơmơt jên jang 2 tơdrong vă jang pơtăm, pơm hơtŏk pơm tơlĕch rim tơmam drăm ‘long pơgang, akŏp kon jên tơmơ̆t jang dang hloh 2.000 ti hlak jên tơ̆ 2 tơring ou, ‘nou gô jing jơhnơ̆m pran vă 2 tơring hơnơ̆ng atŏk tơ iung tenh koăng, kơjăp ‘lơ̆ng.“Tơgum djru 2 tơring Mường Hoong, Ngọk Linh ‘nŏh kiơ̆ kơ nhôn kăl pơjao ăn kon jên hu jang sa ăn kon pơlei. Lơ̆m tơdrong klăh asong kon jên jang păng khul jang oei ăn lơ kơ 2 tơring tơnap tap kiơ̆ trong tơlĕch ăn. ‘Ngoăih kơ ‘noh, nhôn kăl hơvơn rim hơnih mơdro sa, bơngai tơmơ̆t jên jang năm tơ̆ 2 tơring ou, vă đơ̆ng noh pơjing đei tơdrong jang sa ăn kon pơlei”.

Jĭ hơnih jang đei pơjao chĕp pơgơr lơ̆m bơ̆ jang chă pơrô̆ pơrôp, tơgŭm djru kon pơlei 2 tơring dơnuh hloh kơ dêh char tơplih jơhngơ̆m đon tơchĕng, trong jang sa, ƀok Trịnh Ngọc Tâm, Kơ iĕng Kơdră Hơnih Jang Pơrô̆ pơrô̆ kơ Đảng dêh char Kon Tum tơbăt, Hơnih ou hlôi pơchoh trong vă dêh char ăn khul kang ƀô̆, đảng viên sơnăm mơlôh jang hơgei kơ rim hơnih bơ̆ jang vih năm tơ̆ tơring, tơ̆ pơlei.“Kang ƀô̆, đảng viên đei ăn năm jang ‘noh dôm kang ƀô̆ sơnăm mơlôh, bơ̆ jang tơnăp, jang gơ̆h, đe sơnăm chă pơrô̆ pơrôp, pơtho tơbăt ăn kon pơlei jang kiơ̆ khoa hŏk kih thuơ̆t, hơnhăk ba dôm trong ‘nao truh hăm tơring, tơgŭm kon pơlei, tơklep hăm kon pơlei, pơtho ăn kon pơlei tơplih trong jang sa, akŏm dôm tơdrong jang mŭk drăm đei iŏk yau kơjăp”.

Dêh char đei 23 hơnih bơ̆ jang vang iung jang, ăn kang ƀô̆, đảng viên vang mơ̆t jang lơ̆m Khul bơ̆ jang kơ Hơnih Đảng dêh char Kon Tum găh tơgŭm kon pơlei Mường Hoong, Ngọk Linh. Atŭm hăm apŭng Đak Glei jei pơjing khul bơ̆ jang tơgŭm djru 2 tơring. Ƀok Lê Viết Nam, Kơdră chĕp pơgơ̆r Hơnih vei lăng kon pơlei apŭng Đak Glei tơbăt, 22 pơlei kơ 2 tơring jei đei khul bơ̆ jang năm jang tơ̆ ou. Kang ƀô̆, đảng viên vang hơrih sa, jang sa hơdoi hăm kon pơlei, pơtho ăn kon pơlei jang sa đei iŏk yua kơjăp. Kang ƀô̆ dêh char, apŭng păng tơring pơrô̆ hơvơn khul kang ƀô̆, đảng viên rim pơlei pơla vang iung jang, pơm jŭk yŭk trong hơlou jang kiơ̆ rim trong jang tơplih ‘long pơtăm jang sa.

Truh dang ei, tơdrong iŏk đei jơnei tih tên hloh ‘noh hlôi tơgŭm ăn kon pơlei tơplih jơhngơ̆m đon tơchĕng, trong jang sa, jang kiơ̆ khao hŏk kih thuơ̆t lơm choh jang sa. Hăm dôm mir pơgar sâm Ngọc Linh gĭt kăl, dôm mir pơgar chehphe plei triu trăi, dôm kơnong sâm hroi jing ƀlĭk ƀlăk, dang ei kon pơlei ưh khan lăp yak hloh dơnuh mă oei tơchĕng truh pơm pơdrŏng. Kiơ̆ đơ̆ng ƀok Lê Viết Nam, tŏ ‘mi kial, groi teh, kon bơngai tơnăp, dôm tơdrong kăl păng tôm hlôi đei akŏm vă 2 tơring dơnuh Mường Hoong, Ngọk Linh atŏk tơ iung.“Hăm tơdrong akŏm iung jang kơtang đơ̆ng khul chinh trĭ, kon pơlei ưh khan lăp yak hloh dơnuh mă lei oei tơchĕng truh pơm pơdrŏng, pơm pơdrŏng kơtă lơ̆m pơlei pơla kơdih hăm rim trong choh jang sa. Trong tơlĕch jang trŏ ƀlep, kang ƀô iung jang kơtang, tơgŭm ăn khul chinh trĭ, mă kăl ‘noh rim bơngai tơmơt jên jang, rim hơnih mơdro sa ưh kơ jor tơdrong hơrih sa kơ kon pơlei hlôi tơplih ‘nao.”

Ba Tơdrong tơchơ̆t Hop akŏm tih kơ Đảng, hơnhăk Nơ̆r athei jang kiơ̆ đơ̆ng Ban Bí thư tơlĕch jang kiơ̆, dêh char Kon Tum hlôi iung jang jơnei lơ̆m bơ̆ jang xut xa pơngot rơvĕt, tơjur dơnuh 2 tơring dơnuh hloh dêh char Kon Tum ‘noh Mường Hoong păng Ngọk Linh (apŭng Đak Glei). Trong tơlĕch jang ƀlep, kang ƀô, đảng viên iung jang kơtang, kon pơlei phĭ tơtŏ dơnŏ ‘lơ̆ng. Tơplih jơhngơ̆m đon tơchĕng, trong jang sa jĭ tơdrong tơm hloh vă bơngai Xdang oei tơ̆ tơring groi kông ou yak hloh dơnuh hin. Hăm dôm trong jang sa iŏk đei jơnei ‘moi kiơ̆ dôm tơdrong đei kơ groi teh, tŏ ‘mi kial sơđơ̆ng, dơnơm ‘long chehphe, ‘long pơgang, mă kăl ‘noh sâm Ngọc Linh, hlôi păng tŏk bŏk lang să jĭ hơyak pran kơjăp iăp kơtang tơgŭm ăn kon pơlei lui tơ̆ hơnăp kĕ yak hloh dơnuh hin păng tơchĕng truh pơm pơdrŏng.

Đơ̆ng iŏk jơnei păng ƀôh hơdăh yan ou lơ̆m bơ̆ jang xut xa dơnuh 2 tơring Mường Hoong, Ngọk Linh, Hơnih Đảng dêh char Kon Tum tŏk bok hơnơ̆ng lang să iung jang tơgŭm ăn 57 ŭnh hnam tơ̆ 8 tơring tơnap tap anai kơ dêh char. 58 Hơnih bơ̆ jang hlôi đei pơjao hơdăh tơdrong jang vă tơgŭm ăn rim pơlei pơla xut xa dơnuh, atŏk tơ iung mŭk drăm tơpôl.