Khul kơpal kơyuơ Thượng tướng Phùng Sĩ Tấn, Phŏ Kơdră Anih tơm tơgŭm jang gah Khul linh Kon pơlei Việt Nam chĕp kơ̆l khul hlôi pơjao hnam 'mêm kơ-eng ăn 5 unh hnam mă teh đak tơchơ̆t tơgŭm, rim tŏ hnam đei kơjă 80 triu hlj, păng 10 tŏ hnam Tơguăt tơguăl ăn dôm unh hnam hin dơnuh, rim tŏ hnam đei kơjă 50 triu hlj. Atŭm hăm noh, đe kơdră kơ Anih tơm tơgŭm jang gah Khul linh oei asong 50 tơpu tơmam ăn unh hnam tơnap tap lơ̆m dêh char. Hơkŏp kơjă hnam păng tơmam asong noh jê̆ 1,1 tih hlj. Kiơ̆ Đe Kơdră Anih tơm tơgŭm jang gah Khul linh 'noh, Tây Nguyên hơnơ̆ng đei Đảng, Teh đak păng Anih tơm pơgơ̆r Khul linh teh đak lăng jĭ tơring kăp gĭt lơ̆m tơdrong jang vei sơđơ̆ng tơpôl kơ jơ̆p teh đak.

Tơ̆ ou, kon pơlei kon kông dêh char Đăk Lăk pơma hơdrô̆ păng dôm dêh char Tây Nguyên pơma hơtŭm hơnơ̆ng chĕp vei trong jang kăch mạng, tơguăt minh ƀơ̆r đon tơblah ayăt tơgar. Tơdrong mă oei tơbang hơdah lơ̆m Tơdrong tơblah tih Tây Nguyên, ah mă khul linh păng kon pơlei jơ̆p teh đak akŏm jơhngơ̆m iung tơjră đei iŏk jơnei, rơngei tơring pơbah, rơngei hiôk hian ăn teh đak.