Trung tướng Phạm Thế Tùng, Phŏ kơdră tơm vei lăng Công an, truh akŏm păng tang măt ăn Anih tơm vei lăng Công an pơjao ăn dêh char 231 ti hlak jên – kơsô̆ jên yoa đơ̆ng đe kăn ƀô̆, linh lơ̆m Anih tơm tơra tơgop vă bơ̆jang vang tơgŭm kŭm hăm dêh char bơ̆jang tơdrong ‘nâu.

Pơma nơ̆rpơtho tơ̆ jơ pơm lêh, Trung tướng Phạm Thế Tùng pơma hơdăh, Anih tơm vei lăng Công an pơkăp vă yak hơdoi hăm dêh char Gia Lai lơ̆m tơdrong sut pơđĭ hnam hiăh hiok, pơm ‘lơ̆ng ăn kon pơlei đei anih oei xa sơđơ̆ng ‘lơ̆ng ngăl. Ƀok pơma, hăn đon jang tơnăp hlŏh, khul linh công an hơnơ̆ng năm hơdrol lơ̆m tơdrong mong akŏm jên, tơmam, tŏk hrĕnh tơdrong jang ming man păng pơm hơmet hnam, atŭm hăm ‘nŏh vei lăng kơjăp tơdrong sơđơ̆ng lơ̆m khei ‘năr ming man. Kiơ̆ trong vă jang, dêh char Gia Lai vă sut pơđĭ 8.485 tŏ hnam lơ̆m tơdrong jang "Vang sut pơđĭ hnam hiăh hiok" lơ̆m sơnăm 2025.