Ƀok Huỳnh Đảm, kơdră so chĕp pơgơr Hơnih bơ̆ jang Trung ương MTTQ Việt Nam lăp đon hloh ‘noh Jơnei tih tên pơyan puih mak 1975, iŏk đei đơ̆ng tơdrong chĕp pơgơ̆r kơ Đảng, kơ Ƀok Hô, iŏk đei đơ̆ng jơhngơ̆m pran kơ Ƀô̆ đô̆i kon pơlei Việt Nam nuih mơng, đơ̆ng jơhngơ̆m pran tơgoăt tơgoăl pôm nơ̆r ƀơ̆r đon hơdrĕch hơdrung. Lơ̆m mă noh pơ đĭ hơdrĕch hơdrung tơgoăt dih băl mĭnh nơ̆r ƀơ̆r đon,  Kơdră kơpal krao tơring drơ̆ng nơ̆r, tơring hơpơi ‘meh kơdră kơpal drơ̆ng nơ̆r tơgŭm djru. Kơ yuơ tơdrong ‘noh pơjing đei jơhngơ̆m pran kơtang hloh kơ hơdrĕch hơdrung păng ƀôh hơdăh hloh ‘noh jơhngơ̆m pran đơ̆ng tơgoăt mĭnh nơ̆r ƀơ̆r đon ƀô̆ đô̆i-kon pơlei. Ƀok Huỳnh Đảm, tơdrong tơgoăt mĭnh nơ̆r ƀơ̆r đon ƀô̆ đô̆i kon pơlei ou hlôi tơƀôh hơdăh hloh dơ̆ng lơ̆m ‘măng Iung tơblăh Hồ Chí Minh:“Mưh rim khul ƀô̆ đô̆i tơm iung tơblăh kơtang, pơjei iŏk đei rim hơnih tơm kơ Sài Gòn - Gia Định ‘noh lơ̆m mă noh kon pơlei tơ̆ Sài Gòn -Gia Định jei iung tơjră vang iŏk đei rim koeng kơphô̆, iung tơjră pơjei iŏk rim tơring. Hla kơ pơkao nơ̆r pơma ưh khan lăp sơng chơt hơ iă khul ƀô̆ đô̆i iŏk đei jơnei mă oei vei lăng năng tông sơđơ̆ng, vei lăng dôm tơdrong iŏk đei jơnei ‘măng iung jang kĕch mang đơ̆ng jơ ‘năr blŭng mă bơ̆n hlôi iŏk đei jơnei”.

Trung tướng, Phó Giáo sư - Tiến sỹ Trần Vi Dân, Kơdră chĕp pơgơ̆r Hơnih tơm jang Khoa hŏk, Trong jang kăl păng Chăl sơnăm Kŏng ang găh Hơnih tơm Kŏng ang tơroi tơbăt, tơdrong tơ iung pơjing păng vei kơjăp jơhngơ̆m đon kon pơlei, tơ iung pơjing jơhngơ̆m pran kon pơlei đei Đảng bơ̆n lăng ba kơjăp. Đảng bơ̆n hlôi pơrô̆ chĕp pơgơ̆r vă tơ iung pơjing, hơmet ming jơhngơ̆m đon iung tơblăh đơ̆ng pơ đĭ kon pơlei hăm trong jang “Ưh kơ đei yă kiơ gloh loi kơ pơm tơm kơdih, rơngei hiôk hian”. Jơhngơ̆m đon păng trong trŏ lăp ‘noh lơ̆m jơhngơ̆m đon kon pơlei, hlôi jing jơhngơ̆m pran, pơjing jơhngơm pran vă iŏk đei jơnei, pơrăm kĕ jơhngơ̆m pran  chư̆ kơtang kơ ayăt.

‘Moi kiơ̆ vei kơjăp jơhngơ̆m đon kon pơlei, akŏm đei jơhngơ̆m đon kon pơlei, Đảng bơ̆n hlôi vei lăng năng tông tơ iung pơjing vă chĕp pơgơ̆r, pơrô̆ pơjing đei jơhngơ̆m pran kon pơlei kơjăp, lơ̆m ou đei hơnăp jang kăl kơ Khul ƀô̆ đô̆i kon pơlei păng tơ̆ tơring Pơbăh ‘noh khul ƀô̆ đô̆i pơm rơngei păng khul vei lăng sơđơ̆ng tơring Pơbăh. Trung tướng Trần Vi Dân pơma hơdăh, trong ƀôh hơdăh găh “vei kơjăp jơhngơ̆m đon kon pơlei păng tơ iung pơjing jơhngơ̆m pran kon pơlei oei ling lang jing tơdrong kăl hloh”, lơ̆m chăl bơ̆ jang kĕch mang hrei ou:“Nhôn ƀôh tơdrong vei kơjăp jơhngơ̆m đon kon pơlei păng tơ iung pơjing jơhngơ̆m pran kon pơlei oei jing tơdrong kăl hloh. Păng hăp hơnơ̆ng pơih ăn kơ bơ̆n dôm trong tơlĕch ăn lơ̆m hơlêm, pơtrŭt vă kon pơlei lăp đon, lui kiơ̆ trong bơ̆ jang đơ̆ng Đảng, khôi luơ̆t Teh đak. Păng pơgơ̆r akŏm, pơchoh trong chĕp pơgơ̆r, pơrô̆ jang păng đei dôm trong jang trŏ lăp vă pơjing đei jơhngơ̆m pran kon pơlei kơjăp vă kơ bơ̆n tơ iung pơjing, vei lăng Teh đak lơ̆m chăl hle, chăl atŏk tơ iung kơrŭn kơtang kơ hơdrĕch hơdrung Việt Nam”.

Thượng tướng Trịnh Văn Quyết, Bí thư Trung ương Đảng, Kơdră jang lơ̆m Khul kơdră chĕp pơgơ̆r Quân ủy Trung ương, Kơdră chĕp pơgơ̆r Hơnih tơm Chinh trĭ Khul Ƀô̆ đô̆i kon pơlei Việt Nam, lơ̆m iung pơma tơ̆ Hop akŏm “Jơnei tih tên pơyan Puih mak 1975 hăm Chăl atŏk tơ iung ‘nao kơ hơdrĕch hơdrung Việt Nam”, pơgơ̆r pơgê năr 19/4 ou ki sơkơ̆t hơdăh: Jơnei kơ ‘măng Iung tơblăh tih păng iung tơjră Puih mak 1975 ‘noh mĭnh lơ̆m dôm chăl sơnăm nuih mơng pran kơtang hloh lơ̆m chăl sơnăm tơ iung pơjing teh đak păng vei lăng teh đak kơ hơdrĕch hơdrung Việt Nam. ‘Noh jing tơdrong jơnei kơ tơdrong nuih păng gơh hơgei Việt Nam, jing tơdrong tơgoăt iŏk kơ tơdrong joăt joe ‘mêm kơ eng teh đak kơjăp iăp kơtang hăm jơhngơ̆m đon ‘meh vă teh đak rơngei keh kong păng jơhngơ̆m đon hơpơi ‘meh vă rơngei, hơnih akŏm kơ jơhngơ̆m pran tơgoăt tơgoăl pôm nơ̆r ƀơ̆r đon hơdrĕch hơdrung hăm jơhngơ̆m pran chăl sơnăm păng tơgoăt tơgoăl pôm nơ̆r ƀơ̆r đon apŭng plĕnh teh.

Jơnei tih tên pơyan Puih mak 1975 oei iŏk đei jơnei kơtang kơ tơdrong iung tơjră pơm rơngei hơdrĕch hơdrung chăl XX, tơgop gĭt kăl lơ̆m ‘măng iung tơblăh kơ kon bơngai kơ yuơ tơdrong pơm tơm kơdih, rơngei hiôk hian, hơtŏ hơnơ̆ng păng gơh hơgei tơpôl; pơtrŭt, hơlêm rim hơdrĕch hơdrung răm đe pơgŏ pơđep iung tơjră, pơ̆ih trong blŭng ăn pơrăm kĕ khul ayăt lơ̆m plei teh. Thượng tướng Trịnh Văn Quyết pơma hơdăh:“Iung jang kiơ̆ nơ̆r krao hơvơn đơ̆ng Đảng păng Kơdră chĕp pơgơ̆r Teh đak Hồ Chí Minh, pơ đĭ hơdrĕch hơdrung Việt Nam tơgoăt tơgoăl pôm nơ̆r ƀơ̆r đon kơjăp, lăp mĭnh ƀŏr đon pơ đĭ găh hlôh vao, hơdrin păng iung jang; tơgoăt pôm nơ̆r đon lơ̆m Đảng, tơgoăt tơgoăl pôm nơ̆r ƀơ̆r đon kon pơlei, khul ƀô̆ đô̆, tơgoăt tơgoăl pôm nơ̆r ƀơ̆r đon Tu-Pơbăh, tơgoăt tơgoăl pôm nơ̆r ƀơ̆r đon rim khul ‘mêm kơ eng teh đak păng gơ̆h hơgei, tơgoăt tơgoăl pôm nơ̆r ƀơ̆r đon apŭng plĕnh teh... Gơnơm đơ̆ng noh, pơđĭ khul Đảng, Ƀô̆ đô̆i păng kon pơlei bơ̆n tơ̆ ƀar tơring Pơbăh-Tu hlôi kĕ yak hloh tơdrong tơnap tap, iung yak năm tơblăh pơrăm kĕ dôm trong iung tơblăh pơjei iŏk đơ̆ng Mi păng khul ayăt”.

Jơnei tih tên pơyan Puih mak 1975 ling lang jing hơnglŏng hơdăh ang rang ‘lơ̆ng lơ̆m chăl sơnăm iung tơjră tơ iung pơjing păng vei lăng teh đak đơ̆ng hơdrĕch hơdrung Việt Nam pơma atŭm, chăl sơnăm iung tơblăh kĕch mang Việt Nam pơma hơdrô̆ . Dôm tơdrong kăp gĭt chăl sơnăm, rim trong ƀôh hơdăh ‘lơ̆ng đơ̆ng Jơnei tih tên pơyan Puih mak 1975 hlôi, tŏk bŏk păng gô ling lang đei rim jơhnơr đơ̆ng rŏng kiơ̆ yok rok jơ̆ng, pơjing đei hơyak pran vă pơ đĭ hơdrĕch hơdrung yak mơ̆t lơ̆m Chăl hle.