Tơ̆ rim jơ tơƀơ̆p đơ̆ng khul kơdră tang măt Kuô̆k hŏi tơ̆ dêh char Lâm Đồng, bơngai tăh hla athei kăl pơjao tơdrong jang, gơ̆h jang mă hơdăh ƀar păh dêh char păng tơring mưh jang kiơ̆ khul kơdră chĕp pơgơ̆r ƀar kâp, mă kăl pơm sơđơ̆ng gơ̆h jang ƀơk hla bơar pơm tơngla teh ăn kon pơlei. Athei pơtôch hloi sir iŏk tơmam drăm lơ̆m teh hăm kmăi kmŏk so sĕnh pơm kơnê̆ cham char; dăr lăng iŏk tơvih teh mir đak lar tim mă iŏk yoa, pơjao dơ̆ng ăn tơring, păng lăng kơjăp tơmơ̆t jên jang hơmet ming pơ ‘lơ̆ng trong nơnăm. Kră pơlei Liêng Jrong Ha Bri, oei lơ̆m thôn 1, tơring Lạc Dương, dêh char Lâm Đồng tơbăt: “Lơ kon pơlei tơ̆ ou ‘meh vă đei hla bơar pơm tơ-‘ngla teh mă lei hrei ou tơring bơ̆n tim mă pơm ăn, apĭnh Kuôk hô̆i lăng hơlen păng xek tơlang kơ yuơ ‘noh jĭ tơdrong ‘meh vă đei kăl hloh kơ kon pơlei. Mĭnh twodrong dơ̆ng ‘noh lăng hơlen dơ̆ng tơmam drăm ya, hrei ou ba ƀôh đei lơ tơmam drăm ya, phŏng ya, chehphe jei pơm ya mơ̆n. Apĭnh Teh đak dăr lăng hơlen hloh dơ̆ng tơdrong ‘nou ăn kon pơlei”.

Tơ̆ jơ tơƀơ̆p bơngai tăh hla, tang măt ăn khul kơdră tơring, rim hơnih bơ̆ jang ƀơm truh kơ dêh char Lâm Đồng hlôi tơroi tơbăt, tơl hơdăh, tơgoăt iŏk dôm nơ̆r tơgop đơ̆ng kon pơlei athei khul kơdră tơring lăng kơjăp xek tơlang păng chih iŏk dôm nơ̆r tơgop pơtruh ăn Kuô̆k hô̆i lăng hơlen.

Hop akŏm tơƀơ̆p pơma dơnuh hăm bơngai tăh hla păh Hơlĕch kơ dêh char Dak Lăk (dêh char Phú Yên so) đei Khul kơdră tang măt Kuô̆k hô̆i dêh char Dak Lăk pơgơ̆r kơtă hloi tơ̆ phương Tuy Hòa păng pơdăh trư̆k tuyên truh rim hơnih pơgơ̆r kơ rim tơring, phương: Đông Hoà, Sông Cầu, Tuy An Bắc, Phú Hoà 1, Tây Hoà, Sơn Hoà, Sông Hinh păng Đồng Xuân. Rim bơngai tăh hla hôn bơnê kơtang tơdrong jang tơnăp đơ̆ng Kuô̆k hô̆i, adoi pơma tơbăt jơhngơ̆m đon hơpơi ‘meh vă Dak Lăk đei pơchoh trong atŏk tơ iung ‘nao đơ̆ng rŏng hơgrop. Bơngai tăh hla Võ Ngọc Hiền Minh, oei tơ̆ phương Tuy Hoà, dêh char Dak Lăk tơbăt: “Dêh char Dak Lăk so ‘noh jĭ tơdrong oei sa joăt joe kơ tơring Tây Nguyên bri kơdrơ̆ng, lơ̆m mă Phú Yên ‘noh tơring tơmăn. Tơdrong hơgrop, mơ̆t lĕch dih băl tơdrong oei sa joăt joe ƀar păh tơring đak dơsĭ păng tơring bri gô pơih trong rơvơn atŏk tơ iung tih tên ăn dêh char Dak Lăk ‘nao. Hơpơi ‘meh vă khul kơdră chĕp pơgơ̆r lăng ba, pơrô̆ tơtom vă tơ iung pơjing dêh char roi năr roi ‘lơ̆ng liĕm, tơdrong hơrih sa kơ kon pơlei roi năr roi sơđơ̆ng dơ̆ng kơjăp hloh dơ̆ng”.

Lơ̆m mă noh, bơngai tăh hla rim tơring găh Pơmơ̆t dêh char Dak Lăk pơma tơbăt jơhngơ̆m đon tơgŭm djru kơtang trong jang khul kơdră ƀar kâp đei iung jang đơ̆ng blŭng khei 7 truh dang ei. Bơnai tăh hla athei kăl atŏk kơtang khul jang, pơgơ̆r pơtho tơbăt pơm hơtŏk bơ̆ jang ‘lơ̆ng ăn khul kang ƀô̆ tơring; tơmơ̆t jên jang ‘lơ̆ng, răt kmăi kmŏk ‘lơ̆ng tơgŭm ăn bơ̆ jang chĕp pơgơ̆r, vei lăng vă sơđơ̆ng jơnei păng veh ver trăp tơdrong jang ăn tơring, mă kăl lơ̆m bơ̆ jang vei lăng groi teh đơ̆ng rŏng jang kiơ̆ trong jang khul kơdră ƀar kâp.

Iung pơma tơ̆ jơ tơƀơ̆p, yă Nguyễn Thị Thu Nguyệt, Kơ iĕng kơdră Khul tang măt Kuô̆k hô̆i dêh char Dak Lăk athei rim khul kơdră chĕp pơgơ̆r đơ̆ng dêh char truh tơ̆ tơring hơnơ̆ng chă tơchĕng hơlen kơjăp rim tơdrong tơchơ̆t đơ̆ng Trung ương, mă kăl ‘noh tơdrong tơchơ̆t găh proh hơmet khul kơdră chĕp pơgơ̆r, đơ̆ng noh xek tơlang ‘lơ̆ng hơ iă dôm tơdrong ăn hơnih mơdro sa păng kon pơlei: “Hơnih vei lăng kon pơlei dêh char Dak Lăk kăl hơnơ̆ng dăr lăng, tơlĕch rim trong jang hơdăh vă iung jang keh đang trong tơlĕch jang tŏk mŭk drăm 8% kiơ̆ nơ̆r pơrô̆ đơ̆ng Khul kơdră Teh đak truh sơnăm 2025, adoi hơdrin iok đei tŏk mŭk drăm ƀar kơsô̆ lơ̆m jăl đơ̆ng rŏng. Vă jang đei tơdrong ‘nou, trong tơlĕch ăn ‘noh kăl iŏk đei mĭnh păh sơđơ̆ng khul chĕp pơgơ̆r, mĭnh păh klah asong trong chĕp pơgơ̆r mă hơdăh, pơjao tơdrong jang mă ƀlep ăn tơring, sơđơ̆ng rim trong jang atŏk tơ iung kơjăp ‘lơ̆ng păng ƀlep hăm tơdrong pơjao gơh jang”.

Lơ̆m tơdrong pơgơ̆r tơpăt, phăl hơlăng, Hop akom tơƀơ̆p pơma dơnuh hăm bơngai tăh hla kơ rim khul kơdră tang măt Kuô̆k hô̆i dêh char Dak Lăk păng Lâm Đồng hlôi hơnhăk đei tơdrong hơ iă. Rim kơdră tang măt Kuô̆k hô̆i, tang măt ăn tơring păng rim hơnih jang hlôi tơgoăt iŏk, tơblang hơdăh lơ tơdrong kăl; sơkơ̆t hơdăh gô hơnơ̆ng chă mơ̆ng păng yak hơdoi hăm bơngai tăh hla lơ̆m khei ‘năr tơ iung pơjing tơring atŏk tơ iung kơjăp ‘lơ̆ng.