Dang ei lơ̆m dêh char đĭ đei hloh 2.000 tŏ hnam pơm đang. 1,2 tơring nhen thị xã An Khê păng pơlei tơm Pleiku đĭ jang đang tơdrong jang. Hăm kơsô̆ jên tơgŭm 60 triệu hlak jên 1 ŭnh hnam man ‘nao păng 30 triệu hlak jên 1 ŭnh hnam pơm hơmet ming, dôm tơring hlôi hơvơn jên jang kơtă hơnih, hơtŏk hơnăp jang kơchăng đơ̆ng kon pơlei.

Anih tơm pơgơ̆r Khul lĭnh dêh char Gia Lai păng dôm anih jang khŭl lĭnh lơ̆m tơring tơgop vă jê̆ 4.000 năr jang, tơgŭm chơ bơ̆n chuơh, tơmo, xi măng..., pơm hnam păng dăr hơlen bơ̆jang. Mă lei, dêh char Gia Lai oei tơƀơ̆p mơmat tat yua đơ̆ng tơmam man tŏk, ưh kơ măh bơngai jang păng jên oei ưh kơ lơ đơ̆ng păih ŭnh hnam kon pơlei. Anih vei lăng kon pơlei dêh char athei dôm tơring hơtŏk loi dơ̆ng hơlen lăng, pơgơ̆r păng tơtĕnh iŏk yua dôm kon jên jang vă jang đang trong tơlĕch jang ƀlep khei ‘năr.