Mĭnh tơdrong jang kơtang lang să hlôi đei Khul drŏ kăn apŭng Thuận Châu (so) iung jang hơdoi kơjăp hăm hơnih jang Pơgang Sơn La tơlĕch jang lơ̆m jơ̆p 23 tơring tơnap tap hloh. Hăm trong jang “Pơtho tơbăt yak hơdrol, tơgŭm djru kiơ̆ đơ̆ng rŏng", rim kang ƀô̆ khul păng bơngai jang pơgang hlôi năm truh rim pơlei, hơdrin chă pơrô̆ pơrôp, pơtho khan tơplih “jơhngơm đon tơchĕng, trong jang sa". Yă Lường Thị Thanh Thủy, Kơ iĕng Kơdră chrĕp pơgơ̆r Đảng tơring Thuận Châu, sơ̆ jang Kơdră chĕp pơgơ̆r Khul drŏ kăn apŭng Thuận Châu (so) tơbăt, tơnô̆ tơgŭm djru hơnhơl sơđơ̆ng truh hăm kang ƀô̆, rim bơngai drŏ kăn păng mă kăl bơngai drŏ kăn kon kông ‘noh jing dôm bơngai đei iŏk yoa sa hơpăh đơ̆ng tơdrong jang ou. Gơnơm đơ̆ng noh, pơmai oh drŏ kăn đei sơng iŏk tơdrong tơgŭm djru ou tôch kơ lơ đơ̆ng sơnăm 2021.“Lơ̆m jăl 1 (2021-2025), Thuận Châu hlôi tơlĕch jang hơdăh dôm tơdrong tơgŭm djru hơnhơl ăn rim khul. Kơna pơmai oh drŏ kăn kon kông đei sơng iŏk tơdrong tơgŭm djru rơneh hơ ‘lơ̆p sơđơ̆ng ou tôch kơ lơ”.

Vă sơđơ̆ng jơnei, Khul drŏ kăn apŭng Thuận Châu (so) hlôi pơgơ̆r lăm Pơtho tơbăt trong hlôh vao. Bơngai vang hŏk pơhrăm ‘noh kang ƀô̆ drŏ kăn păng kang ƀô̆ hnam pơgang tơring, dôm bơngai iŏk jang vei lăng bơ̆ jang tơgŭm djru tơ̆ tơring. Khul jei iŏk yoa pơ đĭ kon jên đơ̆ng tơnô̆ tơgŭm djru ou vă chă tơgŭm ăn rim bơngai mĕ bơngai kon kông hơnhơl kon hơ ‘lơ̆p sơđơ̆ng tơ̆ rim hnam pơgang tơring.

Kiơ̆ đơ̆ng yă Lường Thị Thanh Thủy, đơ̆ng sơnăm 2021 truh đĭ sơnăm 2024, apŭng Thuận Châu (so) hlôi tơgŭm ăn hloh 1.600 ‘nu drŏ kăn kon kông găh rơneh hơ ‘lơ̆p sơđơ̆ng. Akŏp kon jên tơgŭm ăn rim bơngai mĕ hlôi truh 2 ti 400 triu hlak jên. ‘Nou jĭ mĭnh lơ̆m dôm tơring đei măt bơngai mĕ bơngai kon kông iŏk đei tơdrong tơgŭm hơhnơl kon hơ ‘lơ̆p lơ hlŏh kơ dêh char Sơn La.“Hơdrol tơlĕch jang kiơ̆ tơnô̆ tơgŭm djru ou ( hơdrol sơnăm 2021) măt bơngai drŏ kăn kon kông truh khăm hơnăp rim khei păng hơnhơl kon hơ ‘lơ̆p tơ̆ hnam pơgang oei tŏ sĕt, lăp dang 600 ‘nu bơngai mĕ lơ̆m mĭnh sơnăm. Mă lei, đơ̆ng rŏng hloh 3 sơnăm tơlĕch jang, hloh 1.000 ‘nu drŏ kăn hlôi năm chă khăm păng hơnhơl kon hơ ‘lơ̆p tơ̆ hnam pơgang tơring. Gơnơm đơ̆ng noh tơdrong vei lăng năng tông jơhngơ̆m jăn ăn bơngai mĕ păng nge đei vei lăng ‘lơ̆ng hloh dơ̆ng, măt bơngai mĕ hiong mưh hơnhơl tơjur kơtang, măt bơngai nge hiok jei tơjur kơtang”.

Dôm tơdrong jơnei hơ iă ou jing hơyak blŭng gĭt kăl hloh vă Khul drŏ kăn Thuận Châu chă apĭnh Trung ương, dêh char păng rim hơnih bơ̆ jang hơnơ̆ng ăn asong tơlĕch jang tơnô̆ tơgŭm djru ou lơ̆m jăl 2 (2026-2030), vă hơnơ̆ng tơgŭm djru pơmai oh drŏ kăn kon kông lơ̆m tơring. Hăm 2 ti 500 triu hlak jên đei tơlĕch ăn, hloh 1.000 ‘nu drŏ kăn tơ̆ Thuận Châu hlôi đei tơgŭm ăn. Hloh 1.000 ‘nu nge đei rơneh sơđơ̆ng, hloh 1.000 ‘nu bơngai mĕ đei vei lăng năng tông sơđơ̆ng. Mŏ Lò Thị Hồng, mĭnh ‘nu drŏ kăn Thái, tơbăt: "Sơ̆ mưh năm tơ̆ hnam pơgang ‘noh nhôn hli, adoi ưh kơ đei jên dơ̆ng. Dang ei đei kang ƀô̆ năm truh tơ̆ hnam chă pơtho khan, adoi tơgŭm ăn dơ̆ng kon jên sơ̆ng sa, jên gre, nhôn tôch sơđơ̆ng jơhngơ̆m. Nge ba pran jăng ‘noh ba chhôk dêh."

Tơdrong vă jang 8 ưh khan lăp ba ăn kon jên hu ăn tơring tơnap tap, mă kăl hloh dơ̆ng ‘noh hlôi pơtruh ăn jơhngơ̆m đon hlôh vao, tơplih jơhngơm đon tơchĕng păng pôk ăn tơdrong sơđơ̆ng ăn dôm bơngai mĕ tơring groi kông, tơgop pơjing đei hơyak ‘lơ̆ng ăn mĭnh jơhnơr hơnô̆ hơnăp kơnh pran jăng grăng akou păng hơtŏ hơnơ̆ng dih băl hloh dơ̆ng.