Tơ̆ tơring Ea Bung, yă Nguyễn Thị Đinh - Hơkăn ƀô̆ đô̆i rơka Nguyễn Huy Nuôi - chhưu lơ̆m jơhngơ̆m mưh đei Kơdră chĕp pơgơ̆r dêh char Dak Lăk atŭm hăm khul bơ̆ jang năm ngôi, pôk ăn tơmam drăm. Yă Đinh tơbăt, sơ̆ kơ yuơ hơrih sa tơnap tap, klo yă đei vei lăng năng tông tơ̆ hơnih vei lăng năng tông ăn bơngai đei iŏk yoa ăn teh đak. 15 sơnăm kơ ou, ŭnh hnam sơng iŏk ƀok brŏk vih tơ̆ hnam vei lăng năng tông păng ling lang sơng iŏk đei tơdrong lăng ba kơjăp đơ̆ng khul kơdră chĕp pơgơ̆r.“Đơ̆ng dêh char, apŭng, tơring, pơlei rim sơnăm truh năr lêh, têt rim khul jei năm ngôi pôk ăn tơmam drăm tôch kơ ‘lơ̆ng. Gơnơm kơ Đảng, Teh đak đơ̆ng noh rim hơnih bơ̆ jang, hăm tơdrong hơrih sa nhen ŭnh hnam bơ̆n lơ lou jei hoei bơih, jei dă ƀiơ̆ bơih.”

Tơ̆ tơring Ea Knốp, ƀok Nguyễn Ái Quế - Bơngai jĭ rơka 3/4, đei tơgŭm ăn 110 triu hlak jên ming man hnam ‘nao să 50m². Ƀok hlôi vang tơblăh tơ̆ Quân khu 5, ƀơm ƀrơ̆m jĭ rơka kơtang tơ̆ Quảng Nam sơnăm 1973. Sơnăm 1985, ƀok chông ba ŭnh hnam mơ̆t tơ̆ Dak Lăk jang sa lơ̆m mă ŭnh hnam oei tôch mơmat tat. “Sơ̆ pơm đei hnam tơ̆r jei gleh hrat bơih, dang ei Teh đak chă pơnat ăn lơ lou ba tôch hơ iă dêh. Bơnê kơ khul kơdră vei lăng năng tông lơ lou ba pă băt vă pơma lơ liơ bơih. Kon pơlei chă mơ̆t ngôi đei hnam lơ lou ba jei hiôk jơhngơ̆m.”

Tơ̆ tơring Quảng Phú, ƀok Ngô Văn Tường tŏk bŏk atŭm hăm thơ̆ pơm keh đang pơbŭng hnam ‘nao kơjă kơjên 150 triu hlak jên, lơ̆m ou Teh đak tơgŭm ăn 110 triu hlak jên. Hơkăn ƀok ‘noh yă Võ Thị Nghĩa - jĭ bơngai đei iŏk yoa ăn kĕch mang, hlôi đei ayăt rôp phak tơ̆ hnam pơnă Buôn Ma Thuột sơnăm 1973 kơ yuơ ba ăn phe ƀa tơmam sa, săi hla bơar pơrô̆ pơrôp, tơroi tơbăt dôm tơdrong ou to ăn ƀô̆ đô̆i.“Đei hnam ‘nou bơih, klo hơkăn nhi pă đei tơtăm yă kiơ bơih lăp hơdrin chă jang sa vă tơdrong hơrih sa kơ klo hơkăn nhi sơđơ̆ng ƀiơ̆.”

Kiơ̆ tơdrong Tơchơ̆t 131 sơnăm 2021 păng Tơdrong tơchơ̆t 21 sơnăm 2024 đơ̆ng Khul Kơdră chĕp pơgơ̆r Teh đak, dêh char Dak Lăk hlôi iung jang keh đang tơgŭm ăn 593 ŭnh hnam bơngai đei iŏk yoa ăn teh đak ming hơmet păng pơm ‘nao hnam oei (142 ŭnh hnam man ‘nao, 451 ŭnh hnam ming hơmet hnam oei). Jơ ‘năr ou, Dak Lăk hlôi pơgơ̆r rim tơdrong jang soh hlôt nhang, soh ŭnh jrĕnh ƀlŏk hơdơ̆r tơ̆ Pơsat teh đak dêh char, tơring; pôk tơmam drăm tơgŭm ăn; pơgơ̆r ba dôm bơngai đei iŏk yoa ăn Teh đak năm tơmang lăng, tơƀơ̆p dih băl tơ̆ Hà Nội.

Ƀok Lê Đức Tịnh - Kơ iĕng Kơdră chĕp pơgơ̆r Sở Nội vụ dêh char Dak Lăk tơbăt, dêh char jei tơlĕch tơdrong jang nhă đak chăm kơtu vă vei lăng năng tông ‘lơ̆ng hơ iă hloh hăm Dôm ƀô̆ đô̆i rơka, ŭnh hnam đei bơngai lôch dŏng Teh đak păng bơngai đei iŏk yoa ăn teh đak:“Sở Nội vụ pơchoh trong ăn dêh char hơnơ̆ng atŏk kơtang tơdrong jang “Đĭ đăng kon pơlei vei lăng năng tông rim ŭnh hnam ƀô̆ đô̆i rơka, ŭnh hnam ƀô̆ đô̆i lôch dŏng teh đak păng bơngai đei iŏk yoa ăn kĕch mang”, sơđơ̆ng bơ̆ jang ‘lơ̆ng lang să, iŏk đei jơnei kơtang; chă hơvơn tơdrong vang iung jang đơ̆ng rim hơnih păng lơ̆m tơpôl găh tơdrong tơ iung pơjing păng atŏk tơ iung “Hơnih mong jên Ƀlŏk hơdơ̆r”. Hơnơ̆ng lăng ba, băt hơdăh tơdrong hơpơi ‘meh vă đơ̆ng bơngai đei iŏk yoa ăn kĕch mang, chă apĭnh hăm khul kơdră chĕp pơgơ̆r đảng păng khul kơdră chĕp pơgơ̆r tơring tơtom xek tơlang dôm tơdrong đei ƀơm truh, sơđơ̆ng đei iŏk yoa sa hơpăh ăn bơngai đei iŏk yoa ăn kĕch mang.”

Hơdrol kơ ‘noh, Khul Kơdră tang măt Kuô̆k hô̆i dêh char Dak Lăk hlôi pơgơ̆r Tơdrong jang brŏk vih hăm kơtu so tơ̆ Hơnih gru gra gĭt kăl dăr sơnăm teh đak găh tơring Đồng Xuân-hơnih pơjing Chi ƀô̆ Đảng cộng sản blŭng a kơ dêh char Phú Yên so păng Hơnih kăn kư̆ groi teh kĕch mang H9, ƀuôn Đak Tuôr, tơring Cư Pui, dêh char Dak Lăk. Tơ̆ ou, rim kơdră tang măt hăm kon pơlei hlôi mơ̆ng nơ̆r tơroi tơbăt dơ̆ng dôm tơdrong sơ̆ ki đơ̆ng dôm bơngai ƀôh kang bang kơl lơ̆m chăl sơnăm ‘noh sơ̆, tơbăt dih băl dơ̆ng dôm tơdrong ưh kơ lai yơ hiơt găh dôm sơnăm tơblăh vang hrang tơƀet mơ mat tat hrat hrĭn tơ̆ Hơnih Kăn kư̆ H9-tơring nuih mơng, hơnih gru kơnăl mĭnh nơ̆r ƀơ̆r đon, nuih mơng pran kơtang kơ ƀô̆ đô̆i păng kon pơlei bơ̆n. Yă Nguyễn Thị Thu Nguyệt - Kơ iĕng Kơdră chĕp pơgơ̆r khul, iŏk jang vei lăng Khul Kơdră tang măt Kuô̆k hô̆i dêh char Dak Lăk pơma hơdăh:“Jơ ‘năr brŏk ngôi hăm Kơtu so gĭt kăl ou tơgŭm ăn rim kơdră tang măt Kuô̆k hô̆i, rim kang ƀô̆, bơngai jang păng kon pơlei đei jơ ‘năr chă tơroi tơbăt dơ̆ng tơdrong joăt joe sơ̆ ki păng hlôh vao hloh dơ̆ng tơdrong tơgop tih tên đơ̆ng mĕ ƀă yă ƀok bơ̆n tơ̆ groi teh ƀĕnh ƀang jơhngơ̆m đon ‘lơ̆ng rŏ joăt joe kĕch mang ou. Đơ̆ng noh, rim bơngai sa roi hôn bơnê kơtang hloh dơ̆ng tơdrong plang ăn pham lĕch sĕch huŏng, pơm hơtŏk hloh dơ̆ng jơhngơ̆m đon ‘mêm kơ eng pơlei pơla, teh đak.  ‘Nou jei jing hơyak kăl hloh vă pơ đĭ khul kang ƀô̆, kon pơlei hơnơ̆ng hơnơ̆ng kơrŭn đĭ ai tơgop kơtang ăn tơ iung pơjing dêh char roi năr roi atŏk tơ iung”.

Khul kơdră tang măt Kuô̆k hô̆i dêh char Dak Lăk atŭm hăm dôm bơngai tơgŭm djru hlôi pôk ăn 30 tong tang vang, hơbĕn ao ‘nao ăn hok tro ŭnh hnam tơnap tap, 236 tơnô̆ tơmam drăm ăn ŭnh hnam đei iŏk yoa ăn teh đak, kon pơlei kon kông, bơngai đei kon pơlei lui yom păng pơjao hơnih cham đă ƀŏng lŏng, hnam ‘mêm mơnat ăn tơring. Tơdrong vei lăng năng tông bơngai đei iŏk yoa ăn teh đak tơ̆ Dak Lăk ưh khan lăp hơnăp jang, mă oei jing tơdrong tơbăt hơdăh jơhngơ̆m đon “Nhă đak chăm kơ tu” tơgop hơmet pơ ‘lơ̆ng tơdrong tơgoăt tơgoăl pôm nơ̆r ƀơ̆r đon kon pơlei pơla.