Lơ̆m jơhngơ̆m đon kơ ƀô̆ đô̆i so Nguyễn Huy Thương, oei tơ̆ apŭng Ea Kar, dêh char Dak Lăk, đơ̆ng vă đĭ sơnăm 1959 ‘noh dôm khei ‘năr ưh kơ lai yơ hiơt. Lơ̆m mă noh sơ̆ ƀok ‘nao 17 sơnăm, hlôi lĕch đơ̆ng pơlei pơla Hà Tĩnh, năm iung jang kiơ̆ nơ̆r krao hơvơn đơ̆ng Teh đak. Hloh 12 sơnăm 7 khei tơklep kơjăp hăm jăl trong Trường Sơn, đơ̆ng mă bơngai tơdăm năm iung jang truh đei jing bơngai ƀô̆ đô̆i, ƀok hlôi ƀôh kơmăt ưh kơbăt dôm yơ bôl boăl lôch răm tơ̆ jăl trong ou. Ƀok Nguyễn Huy Thương tơroi, kơ yuơ trong kăl hloh lơ̆m pơtruh jơhngơ̆m bơngai, mŭk drăm đơ̆ng tơring păh Tu mơ̆t năm tơ̆ kơdrăn tơblăh tơring Pơbăh kơna trong Trường Sơn jĭ jing trong răm kơtang đơ̆ng khul lĭnh ayăt Mi tơdruh ƀôm phă pơrăm. “Trong ou đei 4 hơnih gak, đơ̆ng Quảng Bình năm ‘noh đei 1 hơnih gak, truh tơ̆ tŏk bŏk đei hơnih gak mă 2, mă 3, truh hơnih gak mă 4 ‘noh năm truh tơ̆ Kơđông Cù Bai. Mă lei kơ yuơ păh to ‘noh lĭnh ayăt Sài Gòn, păh ou bơn kơna măh yak trong ver năm tơ̆ Lao Bảo, Triệu Phong, đơ̆ng rŏng ‘noh năm truh tơ̆ trong 9 vă mơ̆t lơ̆m krang 700. Trung đoàn 71 kơ ƀô̆ đô̆i Quân khu 4 đe sư pơjing trong tơ̆ ou đunh bơih, nhôn năm tơ̆ ou hăm tơdrong jang ‘noh pŭ, chơ tơmam drăm, pơm lơ liơ chă chơ sơđơ̆ng, pơtih gia 10 kĭ tơ̆ ou ‘noh năm truh tơ̆ hơnih tuch luch jei kăl đei 1 kĭ. Găh tơdrong lôch răm ‘noh vă tơroi ‘nei ưh kơ kĕ kơtôch ôh”.

Trong Trường Sơn yak kloh klĕch đơ̆ng găh Tu năm tơ̆ Pơbăh, đei jăl trong yak găn hloh tơring pơbăh teh đak Lào, Campuchia. Tơ̆ Đak Lăk, trong Trường Sơn đei jăl trong yak hloh tơring Krông Na, apŭng Buôn Đôn. Lơ̆m ou, Dơnŏk rơkĭ Sêrêpôk jĭ trong kăl hlih pơtruh ăn jơhngơ̆m bơngai, mŭk drăm, chơ pơtruh phe ƀa, ƀrơ̆m phao kơtoang đơ̆ng tơring găh Tu ăn tơring Pơbăh păng ƀar teh đak Lào, Campuchia. Gơnơm trong ou hlôi pơjing rơvơn ăn khul ƀô̆ đô̆i pơm rơngei iung tơblăh ‘măng tơblăh tih Puih mak Mậu Thân 1968, ‘măng Tơblăh Pơyan yă rak sơnăm 1972 păng ‘măng tơblăh Tây Nguyên 10/3/1975 pơih trong ăn iung tơblăh jơnei pơyan Puih mak 1975 teh đak rơngei keh kong.

         Đại tá Lê Xuân Bá, Kơdră chĕp pơgơ̆r Khul joăt joe Trường Sơn - trong Hồ Chí Minh dêh char Đak Lăk, sơ̆ jang Kơdră chĕp pơgơ̆r Sư đoàn 470 tơroi, sơnăm 1973, lơ̆m mă noh sơ̆ jang Kơdră chĕp pơgơ̆r Trung đoàn 4 (Sư đoàn 470, Đoàn 559), đei pơjao tơdrong jang ming an trong Trường Sơn hơtăih dang 80 km đơ̆ng trong 19 (Gia Lai) năm truh tơ̆ đak kroong Sêrêpốk (Đăk Lăk). Lơ̆m ou, jăl trong yak hloh đak kroong Sêrêpôk tơ iung pơjing rim hơnih: dơnŏk rơkĭ găn hloh đak kroong, dơnŏk đak lăh gre nar, gơng đông ăn gre nar, gre ôtô, khul ƀô̆ đô̆i koa đak kroong. “Sư đoàn 470 pơm trong ăn gre nar yak, gre nar, phao kơnong, kon bơngai, phe ƀa tơmam drăm sa, pơgang đĭ đăng tơmam drăm ƀô̆ đô̆i chơ pơtruh, truh hloi ƀrơ̆m phao tih iĕ, ăn gre nar mơ̆t vă pơm rơngei pơlei tơm Buôn Ma Thuột păng pơm rơngei tơring Pơbvăh ‘noh Sư đoàn 470 păng trong Trường Sơn jĭ tơgop tih tên.”

        Jĭ hơnih dơ̆ng gĭt kăl, lơ̆m ‘măng iung tơblăh ayăt Mi dŏng teh đak, Đak Lăk đei lăng jing dôm kơđông iung tơblăh. Trong Hồ Chí Minh găn hloh dêh char Đak Lăk ưh khan lăp mĭnh jăl trong kăl lơ̆m trong chơ ba tơgŭm djru mă lei oei jing kơđông gĭt kăl kơ kơdrăn tơblăh B2, tơgop tơblăh pơrăm kĕ trong iung tơblăh kơ Mi păng khul ayăt Sài Gòn. Kơ yuơ lơ loh, ƀô̆ đô̆i Trường Sơn, hơdruh tơdăm năm iung jang, dân kuân tơblăh, dân kuân vei lăng sơđơ̆ng tơring kơ dêh char Dak Lăk hlôi iung jang kơtang, vei lăng năng tông ‘lơ̆ng hơ iă trong nơnăm tơ̆ đak kroong Sêrêpôk lơ̆m dôm sơnăm tơblăh Mi. Ƀok Tô Tấn Tài, Kơ iĕng Ƀĭ thư so dêh char Dak Lăk, tơbăt.“Tơdrong tơgop đơ̆ng kon pơlei Đak Lăk lơ̆m tơ iung pơjing trong jih mơ̆t tơ̆ tơring Pơbăh tôch tih tên, kon pơlei tơgop jơhngơ̆m hơdruh tơdăm rim hơdrung, lơ̆m mă noh sơ̆ bơ̆n hơvơn tơmơ̆t jang lơ̆m rim hơnih ba hla bơar lơ̆m tơblăh vang. Yak kơtĕch mĭnh năr trong ‘noh truh tơ̆ mĭnh hơnih năm ba hla bơar kơna pơjao ăn rim ‘nhŏng pơmai oh bơngai kon kông kơ dêh char vang mơ̆t jang lơ̆m rim hơnih ‘noh. Đe ‘nhŏng oh vang iung jang, lơ̆m mă noh sơ̆ lôch răm jei tôch kơ lơ mă lei đe ‘nhŏng pơmai oh jei ưh kơ hli, ưh kơ ‘nhuen vang iung jang hơnơ̆ng”.

        Hloh 65 sơnăm đĭ hloh jô̆ đơ̆ng jăl trong đei tơ tơ iung pơjing, dôm trong Trường Sơn nuih mơng păng jơhngơm đon ƀlok hơdơ̆r đơ̆ng dôm ƀô̆ đô̆i so oei ling lang gei kơjăp lơ̆m jơhngơ̆m đon kon pơlei Việt Nam. ‘Nou ưh khan lăp tơdrong tơroi găh tơdrong plang ăn pham lĕch sĕch huŏng, tơdrong mơmat tat, mă lei tơbăt hơdăh jơhngơ̆m đon ‘mêm kơ eng kơ teh đak, jơhngơ̆m đon nuih mơng păng jơhngơ̆m đon hưch hanh hơmanh bơnê hơdrĕch hơdrung. Dôm chăl sơnăm nuih mơng ‘noh sơ̆ hlôi pơjing đei tơdrong hơri nuih mơng, jĭ jơhngơ̆m đon nuih mơng pran kơtang ăn jơhnơr hrei ou păng hơnô̆ hơnăp kơnh, kiơ̆ yok rok jơ̆ng vei lăng năng tông păng jang kiơ̆ tơdrong joăt joe nuih mơng pran kơtang kơ hơdrĕch hơdrung Việt Nam.