‘Nhŏng Rơ Châm Dun, 30 sơnăm (bơngai Jrai, oei lơ̆m pơlei Ngol Rông, tơring Ia Krêl, apŭng Đức Kơ, dêh char Gia Lai) đei Công ty 74, Binh đoàn 15 tơmơ̆t pơm kŏng nhân răih kơ jăr ksu đơ̆ng blŭng sơnăm ou. ‘Nhŏng tơbăt, hăm sa jên khei 7 triu hlak jên lơ̆m 1 khei, ‘nhŏng hlôi đei tơdrong hơrih sa sơđơ̆ng hloh.“ Hơdrol mơ̆t pơm kŏng nhân ‘noh ŭnh hnam bơ̆n tôch mơmat tat, dang ei đei hnam oei, đei tơdrong jang bơih ‘noh ba lăp hơpơi ăn đei tơdrong hơrih sơđơ̆ng, đơ̆ng rŏng ou kon hơ ‘lơ̆p đei hŏk pơhrăm, ba bơnê kơ kŏng ty hlôi tơgum djru ba”

Vă bơ̆ jang ‘lơ̆ng tơdrong jang atŏk tơ iung mŭk drăm atŭm hăm hơmet pơ ‘lơ̆ng sơđơ̆ng tơring sơlam teh đak-sơđơ̆ng tơring sơnăm 2025 păng dôm sơnăm đơ̆ng rŏng, Binh đoàn 15 ‘meh vă krao tơmơ̆t 1.489 ‘nu bơngai jang lơ̆m dêh char Gia Lai. Tơ̆ apŭng sơlam teh đak Đức Cơ, đei Công ty 74, Công ty 75, găh Binh đoàn 15. Lơ̆m dôm sơnăm ou ki hlôi pơtho pơhrăm ăn vă jê̆ 2.000 ‘nu bơngai jang răih kơjăr ksu ‘noh bơngai kon kông kơtă. Đại tá Trịnh Hà Tâm-Kơdră chĕp pơgơ̆r Công ty 75 tơroi găh tơdrong pơjing tơdrong jang ăn kon pơlei lơ̆m tơring:“Công ty 75 hlôi krao tơmơ̆t tôm bơngai jang, 100% bơngai jang ‘noh bơngai lơ̆m tơring. Mưh pơtho pơhrăm tơgŭm djru ‘noh bơ̆n tơgŭm ăn hloi đĭ đăng tơmam drăm nhen ƀơk ăn săng răih vă đe sư hŏk păng pơtho đe sư jang kơ yuơ kăl pơm kiơ̆ ƀlep kih thuơ̆t hơgei păng hơlen, kơ yuơ lơ loh, khul jang pơtho ăn păng kang ƀô̆ ling lang pơm kiơ̆ kơjăp ti chro pơtho ăn răih hloi vă dôm bơngai hŏk ƀôh kơmăt, băt pơm kiơ̆ 3 trong jang kăl ou”

Đại tá Khuất Bá Cao, Bí thư Đảng ủy, Kơ iĕng Kơdră chĕp pơgơ̆r Binh đoàn 15 sơkơ̆t hơdăh, hơnih ling lang lăng kơjăp tơmơ̆t jang hăm bơngai kon kông kơtă pơm kŏng nhân; ‘nou jĭ mĭnh trong tơlĕch jang mă Đảng uỷ, Khul kơdră chĕp pơgơ̆r Binh đoàn 15. Đơ̆ng noh, tơgop atŏk tơ iung mŭk drăm, pơm hơtŏk sơđơ̆ng hơrih sa ăn kon pơlei, vei kơjăp sơđơ̆ng chinh trĭ, sơđơ̆ng tơpôl tơring sơlam teh đak. Đại tá Khuất Bá Cao sơkơ̆t hơdăh:“Vă jê̆ 8.000’nu bơngai kon kông kơ Binh đoàn đei nhôn lăng ba kơjăp. Nhôn hlôi pơrô̆ athei rim hơnih jang kơ Binh đoàn lăng ba, pơm hơtŏk ‘lơ̆ng adoi nhen iung jang kơtang krao tơmơ̆t bơngai kon kông mơ̆t pơm kŏng nhân tơ̆ rim hơnih jang vă sơđơ̆ng ăn jang sa iŏk đei, hơrih sa ăn kon pơlei hăm lơ trong jang vă tơgŭm ăn kon pơlei găh mŭk drăm păng tơmam drăm jang, gre, kih thuơ̆t, hơdrĕch ‘long pơtăm, kon jên tơmơ̆t jang. Hơdrin iung jang hơnơ̆ng pơrô̆ pơrôp pơtho khan ăn kon pơlei hơdrin jang sa tơnăp, pơm kiơ̆ kơjăp kih thuơ̆t ou to”

Lơ̆m 40 sơnăm ou ki, tơ̆ tơring găh Tu Tây Nguyên, Binh đoàn 15 iung jang ting ring tơdrong jang mŭk drăm păng vei lăng sơlam teh đak. Dang ei hơnih ou vei lăng hloh 44.295 ha ksu păng vă jê̆ 400ha chŭn na ƀa đak, ‘long pơtăm, atŭm hăm 6 hnam kmăi pơm tơlĕch kơjăr ksu, lơ̆m 1 sơnăm pơm tơlĕch đei 55.000 tân. Binh đoàn hlôi tơgop hloh 2.800 ti hlak jên lơ̆m kon jên jang teh đak, pơjing đei tơdrong jang sơ đơ̆ng ăn hloh 16.000 ‘nu bơngai jang, lơ̆m ou đei hloh 60% ‘nu bơngai kon kông. Trong jang “tơgoăt kơjăp ŭnh hnam” ƀar păh kŏng nhân bơngai Yuăn hăm bơngai kon kông hăm hloh 4.200 đôi ŭnh hnam, tơgop vei kơjăp tơgoăt tơgoăl pôm nơ̆r ƀơ̆r đon, pơm hơtŏk tơdrong hơrih sa ăn kon pơlei. Kră pơlei Rơ Châm Chich, oei tơ̆ pơlei Beng, tơring sơlam teh đak Ia Chía, apŭng Ia Grai, Gia Lai tơroi tơbăt, gơnơm đei trong bơ̆ jang đơ̆ng Binh đoàn 15 krao tơmơ̆t pơm kŏng nhân kơna tơdrong hơrih sa kơ kon pơlei đei tơplih hơ iă."Binh đoàn 15 atŏk tơ iung lang să mĭnh tơring ksu, chehphe tơ̆ tơring sơlam teh đak Ia Grai, Chư Prông, Đức Cơ, tơdrong hơrih sa kơ kon pơlei hlôi tơplih hơdăh. Tơ̆ tơring nhôn, kŏng nhân kơ công ty 74 (Binh đoàn 15) đei 7 khul jang. Hơdrô̆ lơ̆m pơlei bơ̆n đei 200 ‘nu bơngai Jrai pơm kŏng nhân. Mă kăl ‘noh Kŏng ty lăng tông nông gai kơjăp truh rim ŭnh hnam tơgoăt tơgoăl dih băl kơjăp, chă pơtho ăn pơtăm păng vei lăng mir pơgar ‘long pơtăm, jang chŭn na ƀa đak. Tơdrong hơrih sa kơ kon pơlei nhôn hlôi tơplih ‘nao bơih".

Binh đoàn 15 hlôi bơ̆ jang ‘lơ̆ng tơdrong jang pơrô̆ pơrôp kon pơlei, tơgop jang kiơ̆ ‘lơ̆ng tơdrong jang mŭk drăm vei lăng sơlam teh đak, sơđơ̆ng tơring tơ̆ tơring sơlam teh đak rim dêh char Gia Lai, Kon Tum. Binh đoàn hlôi pơjing tơdrong jang sơđơ̆ng ăn 9.000 ‘nu bơngai jang ‘noh bơngai kon kông; pơjing hloh 4.200 đôi ŭnh hnam kŏng nhân bơngai Yuăn hăm kon pơlei kon kông tơgoăt dih băl, tơgum djru dih băl atŏk tơ iung mŭk drăm.

Tơdrong vei lăng năng tông nông gia tơdrong hơrih sa ăn kŏng nhân, mă kăl ‘noh kong nhân bơngai kon kông, ưh khan lăp pơdơ̆h lơ̆m trong tơmơ̆t jang păng pơm hơtŏk jang sa iŏk yua kơjăp, mă oei iung jang đunh đai tai sơnăm tơgoăt kơjăp ƀar păh hơnih mơdro sa, khul kơdră chĕp pơgơ̆r tơring păng kon pơlei. Dôm tơdrong jang hơdăh, ‘lơ̆ng đơ̆ng Binh đoàn 15 lơ̆m prăt dôm sơnăm ou ki jĭ tơƀôh hơdăh jơhngơ̆m đon lăng ba kơjăp, kơ yuơ kon pơlei pơla-kơ yuơ atŏk tơ iung kơjăp ‘lơ̆ng tơring sơlam teh đak Tây Nguyên.