Kơdră chĕp pơgơ̆r Hơnih bơ̆ jang Kuô̆k hô̆i Lê Quang Tùng đŏk hla bơar tơbăt găh tơdrong jang, tơdrong gơ̆h jang păng hơmet ming hơnih bơ̆ jang kơ Jơnŭm vei lăng kon kông, rim Hơnih bơ̆ jang kơ Kuô̆k hô̆i. Iung pơma tơgop nơ̆r găh tơdrong ou, Kơdră chĕp pơgơ̆r Kuô̆k hô̆i Trần Thanh Mẫn hôn bơnê Hơnih chih tơlĕch bơ̆ jang tôch kơtang, tĕnh koăng lơ̆m tơdrong tơ iung pơjing, pơm pơkeh hô sơ Tơdrong tơchơ̆t vă pơtruh ăn Hơnih bơ̆ jang chĕp pơgơ̆r Kuô̆k hô̆i lăng hơlen, ăn tơgop nơ̆r. Tơdrong pơm pơkeh, pơm hơtŏk rim tơdrong tơchơ̆t gô tơgop pơm hơtŏk jơnei ‘lơ̆ng lơ̆m hơnih jang, tơdrong jang kơ rim hơnih bơ̆ jang kơ Kuô̆k hô̆i.

Kiơ̆ đơ̆ng Kơdră chĕp pơgơ̆r Kuô̆k hô̆i, Tơdrong tơchơ̆t kăl tơklep kơjăp hăm rim hơnăp jang kơ Jơnŭm vei lăng Kon kông, rim Hơnih bơ̆ jang kơ Kuô̆k hô̆i đei tơchơ̆t lơ̆m Khôi luơ̆t hơmet ming, tơmơ̆t dơ̆ng mĭnh ƀar apăng kơ Khôi luơ̆t Bơ̆ jang Kuô̆k hô̆i; sơđơ̆ng ƀlep ăn ‘moi kiơ̆, lei lăi păng trŏ lăp ƀar păh rim hơnih bơ̆ jang.

Kơdră chĕp pơgơ̆r Kuô̆k hô̆i lăp đon hăm dôm tơdrong hơdăh; akhan lơ̆m tơlĕch jang kiơ̆ gô hơnơ̆ng dăr lăng hơlen, tơlĕch trong hơmet ming; adoi hơpơi ‘meh vă Tơdrong tơchơ̆t ou đei tơlĕch jang kiơ̆ hloi. Tơbăt jơhngơ̆m đon lăp đon kơtang găh tơdrong tơchơ̆t lơ̆m hơmet ming hơnih jang, trong bơ̆ jang kơ Jơnŭm vei lăng Kon Kông, rim Hơnih bơ̆ jang Kuô̆k hô̆i, Kơdră chĕp pơgơ̆r Kuô̆k hô̆i akhan:“Găh tơdrong jang, tơdrong gơ̆h jang hơdăh kơ Jơnŭm vei lăng Kon Kông, rim Hơnih bơ̆ jang kơ Kuô̆k hô̆i, ƀơ̆t măt, oei kiơ̆ yok rok jơ̆ng dôm trong bơ̆ jang, tơdrong gơ̆h jang kơ rim hơnih bơ̆ jang sơ̆ ki mưh jang kiơ̆ tơdrong hơmet ming vă sơkơ̆t hơdăh tơdrong jang, tơdrong gơ̆h jang. Tơdrong akŏm hơmet ming ‘măng blŭng mĭnh ƀar tơdrong jang ƀar păh mĭnh ƀar hơnih bơ̆ jang vă sơđơ̆ng trŏ lăp, ‘lơ̆ng hơ iă; hoei kơ lon, hoei hơgrop găh tơdrong jang ‘noh tôch trŏ lăp hăm trong tơlĕch jang. Hơnih bơ̆ jang chĕp pơgơ̆r Kuô̆k hô̆i drơ̆ng nơ̆r trong bơ̆ jang, mĭnh hơnih bơ̆ jang kơ Kuô̆k hô̆i akŏm dăr lăng hơlen dôm tơdrong jang găh hơnăp jang kơ đơ̆ng 2-3 Hơnih tơm, hơnih jang tơ̆ Trung ương vă sơđơ̆ng ăn hơtŏ hơnơ̆ng, trŏ lăp, veh ver akŏm lơ̆m mĭnh ƀar hơnih jang. Ou ki dăr lăng hơlen hlôi đei atŏk kơtang. Ƀlep, kiăp rim tơdrong kăl, đei bơngai tăh hla lăng truh”.

Lơ̆m tơdrong vei lăng tơdrong bơ̆ jang vă trŏ lăp hăm trong tơlĕch ăn, Tơdrong tơchơ̆t kăl sơkơ̆t hơdăh hloh dơ̆ng tơdrong pơvei dih băl ƀar păh Khul kơdră chĕp pơgơ̆r Jơnŭm vei lăng Kon kông, khul kơdră chĕp pơgơ̆r Hơnih bơ̆ jang, Kơdră chĕp pơgơ̆r Jơnŭm vei lăng Kon Kông, bơngai chĕp kơ̆l Hơnih bơ̆ jang păng hơnih jang Kuô̆k hô̆i lơ̆m tơdrong vei lăng tơdrong bơ̆ jang.

Kơdră chĕp pơgơ̆r Kuô̆k hô̆i athei, lăp đơ̆ng rŏng ou hloi, kăl akŏm hloi ăn tơdrong pơm pơkeh rim tơdrong tơchơ̆t đei ƀơm truh hơmet ming hơnih jang, trong bơ̆ jang, hơnih jang tơgŭm ăn, sơđơ̆ng ăn bơ̆ jang ‘lơ̆ng, ưh kơ đei kơtĕch toch broch pơm kơnê̆ truh tơdrong jang kiơ̆ tơdrong jang kơ rim hơnih bơ̆ jang. Kơ yuơ lơ loh, rim hơnih bơ̆ jang đei ƀơm truh tĕnh koăng tơ iung pơjing nơ̆r apĭnh athei, tơlĕch đei hla bơar tơchơ̆t, vei lăng kang ƀô̆, tơdrong bơ̆ jang kơ Jơnŭm vei lăng Kon kông rim Hơnih; sơđơ̆ng tơdrong bơ̆ jang kơ Jơnŭm vei lăng kon kông, rim Hơnih bơ̆jang; hơmet ming, tơmơ̆t dơ̆ng Tơdrong tơchơ̆t 22 kơ Hơnih bơ̆ jang chĕp pơgơ̆r Kuôk hô̆i găh hơnăp jang, tơdrong jang, tơdrong gơh jang, hơmet ming hơnih jang kơ Hơnih bơ̆ jang Kuô̆k hô̆i.

Kơdră chĕp pơgơ̆r Kuô̆k hô̆i Trần Thanh Mẫn athei, Jơnŭm vei lăng kon kông, rim Hơnih bơ̆ jang lăng hơlen mă brĕ găh bơ̆ jang kang ƀô̆ kơ hơnih jang kơdih, ‘nĕ pơm ăn đei tơdrong sơ̆l vơ̆l; chă rơih kang ƀô̆ rim hơnih jang vă iung jang tơgŭm ăn Jơnŭm vei lăng kon kông, rim hơnih bơ̆ jang kăl rơih đei bơngai jang gơ̆h, bơngai tơnăp, bơngai hơgei, bơngai bơ̆ jang ‘lơ̆ng păng mă kăl kăl đei jơhngơ̆m đon tơplih ‘nao.